މާލެ ސިޓީގެ އަންހެނުންނަށް ދިމާވާ ދަތިތަކާއި، ގޮންޖެހުންތައް ބައްލަވާނެ ކަމަށް މާލެ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ރައީސާ ހަލީމަތު ޝިޒްނާ ވިދާޅުވެއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން ޝިޒްނާ ވިދާޅުވީ، މާލެ ސިޓީގެ އަންހެނުންނަށް ދިމާވެފައި ހުރި ދަތިތަކާއި، ކުރިމަތިވާ ގޮންޖެހުންތައް ދެނެގަތުމާއި އެކަންކަމަށް އެ ކޮމީޓީން ކޮށްދެވޭނީ ކޮން ކަމެއްތޯ ބައްލަވައި އެޑްރެސް ކުރެވޭނެ ކަމަކީ ކޮބައިތޯ ބައްލަވާނެ ކަމަށެވެ.
މާލެ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ ރައީސާއަކަށް ހަލީމަތު ޝިޒްނާ އަދި ނައިބު ރައީސާއަކަށް މަރިޔަމް ސައިދާ މިއަދު ވަނީ އިންތިހާބުވެފައެވެ.
އެ ކޮމިޓީގެ ރައީސާއަށް ހޮވުމުން މިވަގުތު ޝިޒްނާގެ ވިސްނުމުގައި ހުރި ކަންކަން ހިއްސާކުރައްވަމުން ވިދާޅުވީ، ރިޔާސަތުގައި އިންނަވައިގެން އެ ކޮމިޓީން އޮނިގަނޑެއް އެކުލަވާލައިގެން ތަންކޮޅެއް ހާއްސަ ގޮތަކަށް ކަންކަން ކުރިއަށް ގެންދެވުމަށް ވިސްނަވާ ކަމަށެވެ. އެގޮތުން އެ ކޮމިޓީގެ ކަންކަން ކުރިއަށް ގެންދިއުމުގައި ކޮމިޓީން ކުރަން ބޭނުންވާ މަސައްކަތްތައް ކުރިއާލާ ޕްލޭންކޮށް ބަހާލައިގެން ކުރިއަށް ގެންދިއުން ކަމުގައި ޝިޒްނާ ވިދާޅުވިއެވެ.
އެ ކޮމީޓީގައި ތިބި 15 މެންބަރުންނަކީވެސް އަންހެން މެންބަރުންކަން ފާހަގަކުރައްވަމުން ޝިޒްނާ ވިދާޅުވީ، ފުރަތަމަ ކުރައްވަން ވިސްނަވާ ކަމަކީ އެންމެން އެކީގައި މަސައްކަތް ކުރަން ފަށްޓަވައިގެން އެންމެން އެކީ "އެމްޕަވާ" ކުރުން ކަމަށެވެ. އެއަށްފަހު މާލެ ސިޓީގެ އަންހެނުންނަށް ކޮށްދެވޭނެ ކަންކަމަށް އިސްކަން ދިނުމަށް ވިސްނަވާފައިވާ ކަމަށެވެ. އެގޮތުން އެންމެ ފުރަތަމަ ކަމަކަށް ޝިޒްނާ ފާހަގަ ކުރެއްވީ، އެކި ދާއިރާތަކުގައި މަސައްކަތް ކުރާ އަންހެނުންގެ މައުލޫމާތު އެއްކޮށް ޑާޓާ ބޭސްއެއް ތައްޔާރުކުރުން ކަމަށެވެ.
މީގެ އިތުރުން ޝިޒްނާ ވިދާޅުވީ އެ ކޮމިޓީ އަކީ ބަޖެޓެއް އޮންނަ ކޮމިޓީއެއް ނޫން ކަމަށާއި އެ ކޮމިޓީން ޖެހޭނީ އަމިއްލައަށް ފަންޑް ރެއިސްކޮށްގެން ކަންކަމަށް ފައިސާ ހޯދަން ކަމަށެވެ. އަދި ކުރީގައި ތާވަލު ކުރެވިފައި ހުރި ހަރަކާތްތައްވެސް އަލުން މުރާޖާކޮށް އިތުރު ކަންކަން ކުރަން މަސައްކަތް ކުރުމަކީ މިހާރު މިވަގުތު ޕްލޭންގައި ހުރި ކަންކަން ކަމަށް ޝިޒްނާ ވިދާޅުވިއެވެ.
ޝިޒްނާއަކީ 19 ވަނަ ރައްޔިތުން މަޖިލީހުގެ މައްޗަންގޯޅި އުތުރު ދާއިރާގެ މެންބަރު މުހައްމަދު ރަޝީދު (ބޯދިގު) ގެ އަނިބިކަނބަލުންނެވެ. މުހައްމަދު ރަޝީދު ވަނީ ކުރީގެ މާލެ ސިޓީގެ ކައުންސިލަރުކަން ވެސް ކުރައްވާފައެވެ.
ތިޔަ ކޮމިޓީ އިންތިޚާބު ކުރެވުނީ ކިހިނެތް. އިންތިޚާބު ހުޅުވާލީ ކޮން އިރަކު؟ ކުރިމަތިލީ ކޮން ބައެއް؟ އެމްޑީޕީ ހަރުގެ ތެރޭގައި ބޭއްވި އިންތިޚާބެއްތަ؟ ހުސް ކޮރަޕްޝަން