ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲއާ ބެހޭ ގޮތުން ޖޭއެސްސީން ބަލަމުންދާ ޝަކުވާ އާންމުކޮށް ހުޅުވާލާގެން ކުރިއަށް ގެންދިއުން އަންނަ އާދިއްތަ ދުވަހަށް ތާވަލުކޮށްފިއެވެ.
ޖޭއެސްސީން މިއަދު ނެރުނު ބަޔާނުގައި ބުނީ، ފަނޑިޔާރު އާދަމް މުހައްމަދާ ގުޅޭ ގޮތުން އެ ކޮމިޝަނުން ބަލަމުންދާ ޝަކުވާ އާންމުކޮށް ހުޅުވާލައިގެން ކުރިއަށް ގެންދިއުމަށް ނިންމާފައިވަނީ އޭނާގެ އެދިވަޑައިގަތުމަށް ކަމަށެވެ. އެގޮތުން، ޖޭއެސްސީން ބުނީ، މި އަޑުއެހުން އޮންނާނީ އަންނަ އާދިއްތަ ދުވަހު މެންދުރު 2:00 ޖަހާއިރު ޖުޑިޝަލް ކޮމްޕްލެއިިންޓްސް އެންޑް އިންވެސްޓިގޭޝަން ސެކްޝަން (ޕޯސްޓް ބިލްޑިން 6 ވަނަ ފަންގިފިލާ) ގައި ކަމަށެވެ.
ޖޭއެސްސީން ބުނީ، އާންމު ރައްޔިތުންނަށް ވެސް ޖާގަ އޮތް މިންވަރަކުން މި އަޑުއެހުމަށް ވަދެވޭނެ ކަމަށެވެ. އަދި އަޑުއެހުމަށް ދާއިރު، ދިވެހި ރައްޔިތެއްކަން އަންގައިދޭ ކާޑު ގެން ދިއުމަށާއި، ގަޑިޖެހުމުގެ 15 މިނިޓް ކުރިން ދިނުމަށް ޖޭއެސްސީން ވަނީ އެދިފައެވެ.
ޖޭއެސްސީން ވަނީ ސުޕްރީމް ކޯޓުގެ އިހްތިސޯސް އިން ބޭރުން އެ ކޯޓުން ކޮށްފައިވާ ކަންކަން ބެލުމަށް ކޮމިޝަނުން އެކުލަވާލި ކޮމިޓީން ތައްޔާރުކޮށްފައިވާ "ދިވެހިރާއްޖޭގެ ސުޕްރީމް ކޯޓުން ނިންމާފައިވާ ގާނޫނު އަސާސީއާ ހިލާފު ނިންމުންތަކާ ގުޅޭ ރިޕޯޓް" ގައި ހިމެނޭ ފަނޑިޔާރުންގެ މައްސަލަތައް ބެލުމަށް ނިންމާފައެވެ. އެގޮތުން، ސުލޫކީ މައްސަލަ ބެލުމަށް އެ ކޮމިޝަނުން ނިންމާފައިވާ ފަނޑިޔާރުންނަކީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި ފަނޑިޔާރު އަބްދުﷲ އަރީފް އާއި ފަނޑިޔާރު އާދަމް މުހައްމަދު އަބްދުﷲގެ އިތުރުން ފަނޑިޔާރު އަބްދުލް ޣަނީ މުހައްމަދެވެ.
