އާޓިފިޝަލް ބީޗުން އޭޑީކޭއަށް ގެންދިޔައިރު މަރުވެފައި އޮތް މީހެއް ދެނެގަތުމުގެ މަސައްކަތް އޭޑީކޭން ފަށައިފިއެވެ. އޭޑީކޭ އިން ވަނީ އެމީހާ ދެގެނަތުމަށް އާންމުންގެ އެހީތެރިކަމަށްވެސް އެދިފައެވެ.
އުމުރުން 50 އިން މަތީގެ އެމީހާ މަރުވެފައިވަނީ އާޓިފިޝަލް ބީޗުން ހޮސްޕިޓަލަށް ގެންދިޔަ އިރު ކަމަށް މަންޒަރު ދުއް މީހަކު ބުނެފައިވެއެވެ. އޭނާ ބުނީ ފަތިހު މޫދަށް ގޮސް އުޅުނު އެމީހާ ހެނދުނު 6 ޖަހާކަން ހާއިރު އެހީއަށް އެދި ގޮވި ކަމަށް ބެލެވޭ ކަމަށެވެ. އަދި އޭނާ ހޮސްޕިޓަލަށް ގެންދިޔަ މަންޒަރު ފެނިފައިވާކަމަށްވެސް ބުނެއެވެ.
ފަތިހު ކަސްރަތަށާއި ފަތާލުމުގެ ބޭނުމުގައި ވަރަށް ގިނަ ބަޔަކު މޫދަށް ގޮސް އުޅެއެވެ. ބެލެވޭ ގޮތުގައި އުމުރުން ދުވަސްވީ އެ މީހާވެސް މޫދަށް ދިޔައީ އެބޭނުމުގައެވެ.
މިހާދިސާއާ ގުޅިގެން ފުލުހުން ބުނެފައިވަނީ އުމުރުން ދޮށީ ފިރިހެނަކު ހާލު ދަށްވެފައި ވާކަމުގެ މައުލޫމާތު ހެނދުނު ލިބިގެން އޭނާ އޭޑީކޭ ހޮސްޕިޓަލަށް ގެންގޮސްދިން ކަމަށެވެ. އަދި އެއީ ކާކުކަން ދެނެގަނެވިފައި ނުވާ ކަމަށާއި އޭޑީކޭން ބުނެފައިވާ ގޮތަށް ނޫކުލައިގެ ސޯޓެއް ލައިގެން އޮތް އެމީހާ ދެނެގަތުމަށް އާންމުންގެ އެހީތެރިކަމަށް އެދޭ ކަމަށެވެ.
