ހދ ކުޅުދުއްފުށީގައި ހިނގި އަލިފާނުގެ ހާދިސާއެއްގައި ދެ ގެއަކަށް ގެއްލުންވެއްޖެއެވެ.
އެމްއެންޑީއެފް އިން ބުނީ، ކުޅުދުއްފުށީ ކަކާ ގޭގެ އެތެރޭގައި ބަހައްޓާފައި ހުރި ސައިކަލެއްގައި ރޯވެގެން އެމްއެންޑީއެފް ފަޔާ އެންޑް ރެސްކިއު ސަރވިސްއިން ހަރަކާތްތެރިވެ އަލިފާންގަނޑު ނިއްވާލާފައި ވާކަމަށާއި އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވާ ކަމަށެވެ.
މި މައްސަލަ އެމްއެންޑީއެފް އެފްއާރުއެސް އަށް ރިޕޯޓްކޮށްފައި ވަނީ ރޭ ފަތިހު 4:10 ކަށް ހާއިރު ކަމަށް އެމްއެންޑީއެފް އިން ބުނެއެވެ. އެމްއެންޑީއެފް އިން ބުނި ގޮތުގައި ކުޅުދުއްފުށީ ފަޔާ ސްޓޭޝަންގެ ސިފައިން ކުރި މަސައްކަތުން އަލިފާން މުޅިން ނިއްވާލެވުނީ ފަތިހު، 4:40 އެހާއިރު އެވެ.
މި ހާދިސާއާއި ގުޅުގެން ފުލުހުން ބުނީ، ގެ އެތެރޭގައި ބަހައްޓާފައި ހުރި ސައިކަލެއްގައި ރޯވެފައި ވާ ކަމުގެ މައުލޫމާތު ފުލުހުނަނަށް ލިބުމާއެކު ފުލުހުން އެ ސަރަހައްދަށް ދިޔައިރު، ސައިކަލުގައި ރޯވެފައި ވާ އަލިފާންގަނޑު ބޮޑުވެ، ކަކާގެ ފުރާޅުގައި ވެސް ރޯވެ، ސައިކަލުގެ ކައިރީގައި އޮތް ރަށު ޕިކަޕެއްގައި ވެސް އަލިފާން ހިފާފައިވާ ކަމަށެވެ.
ފުލުހުން ބުނީ، އަލިފާން ނިއްވާލެވުނު އިރު އެ އަލިފާނުގެ އަސަރު، ކަކާގެއާ އިންވެގެން ހުރި، ނަހާގެއަށް ވެސް ކޮންމެވެސް ވަރަކަށް ކޮށްފައިވާ ކަމަށެވެ.
މި ފަހަކަށް އައިސް އަލިފާނުގެ ހާދިސާތަށް ހިނގުން ވަނީ ގިނަވެފައެވެ.
