އިންޑިއާގެ އެތްލީޓުންނަކީ ބައިނަލްއަގުވާމީ އެތްލީޓުންނާއެކު ބޮޑެތި މުބާރާތްތަކުގައި ވާދަކުރަމުންދާ ބައެއް ކަމަށާ، ނަމަވެސް ހާއްސަ އެހީއަށް ބޭނުން ކުދިން މެރަތަންތަކުގައި ދުވާތަން ފެނުމުން ހާއްސަ އުފަލެއް ލިބިވަޑައިގަންނަވާ ކަމަށް އިންޑިއާގެ ޔޫތް އެންޑް ސްޕޯޓްސް އެފެއާޒް ވަޒީރު ކިރެން ރިޖީޖޫ ވިދާޅުވެއްޖެއެވެ.
އިންޑިއާގެ ކުޅިވަރާ ބެހޭ ވަޒީރު މިފަދަ މޭރުމަކުން ވާހަކަފުޅުދައްކަވާފައި މިވަނީ އިންޑިއާގެ ވެރިރަށް ނިއުދިއްލީގައި މިއަދު ކުރިއަށްދިޔަ 15 ވަނަ އެއާޓެލް ހާފް މެރަތަންގެ ބައިވެރިންނާ މުހާތަބުކުރައްވަމުންނެވެ.
މިއަހަރުގެ ދިއްލީ ހާފް މެރަތަންގައި ބައިވެރިވި ދުވުންތެރިންގެ އަދަދު 11 ޕަސެންޓް އިތުރުވެ، ދުވުންތެރިންގެ އަދަދު 13000އަށްވުރެ މައްޗަށް އަރާފައިވާކަމަށް މައުލޫމާތު ލިބެއެވެ.
މިއަހަރުގެ ދިއްލީ ހާފް މެރަތަން ކުރިއަށް ގެންގޮސްފައިވަނީ އިންޑިއާ ސަރުކާރުގެ ޝިއާރެއް ކަމަށްވާ "ފިޓް އިންޑިއާ" ނުވަތަ "ދުޅަހެޔޮ އިންޑިއާ"ގެ ޝިއާރާ ގުޅުވައިގެން ކަމަށްވާއިރު، މި އިވެންޓްގެ އެކި ހީޓްތަކުގައި ޖުމުލަ 40000އަށްވުރެ ގިނަ މީހުން ބައިވެރިވިކަމަށް ޚަބަރު ލިބެއެވެ.
ދިވެހިރާއްޖޭގައިވެސް ހާއްސަ އެހީއަށް ބޭނުންވާ ކުދިންނަށް ހާއްސަކޮށްގެން ކުޅިވަރު މުބާރާތްތަކާ ދުވުމުގެ އިވެންޓްތައް ބާއްވަމުން އަންނަތާ މިހާރު ވަނީ އަހަރުތަކެއް ވެފައެވެ. އެގޮތުން އެންމެ ގިނަ އަދަދަކަށް ހާއްސަ އެހީއަށް ބޭނުންވާ ކުދިން ބައިވެރިކޮށްގެން ކުރިއަށް ގެންދާ ސްޕެޝަލް ސްޕޯޓްސް ފެސްޓިވަލަށް އެކުންފުންޏާ ސްކޫލްތަކުން ދަނީ އެންމެ ފަހުގެ ތައްޔާރީތައް ވަމުންކަން ފާހަގަކުރަންޖެހެއެވެ.
