ދިވެހިންގެ ތެރޭގައި މި އޮތް އެކުވެރިކަން ދަމަހައްޓަން މަސައްކަތް ކުރަންޖެހޭ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ، އަމީނިއްޔާ ސްކޫލުގެ އަލިމަސް ޔޫބީލް ފާހަގަކުރުމުގެ ގޮތުން މިއަދު ބޭއްވި ޕެރޭޑް ހުޅުމާލޭ ސެންޓްރަލް ޕާކު ސަރަޙައްދަށް ނިންމުމަށްފަހު ސެންޓްރަލް ޕާކްގައި އަމީނިއްޔާ ސްކޫލުން ކުރިއަށް ގެންދިޔަ ހަރަކާތްތަކުގައި ބައިވެރިވެ ވަޑައިގެން ވާހަކަ ދައްކަވަމުނެނެވެ. ނައިބު ރައީސް ވިދާޅުވީ، އަމީނިއްޔާ ސްކޫލުގެ ޕެރޭޑުން ފެނިގެންދިޔައީ އެކުވެރިކަމާ އެއްބައިވަންތަކަން ކަން ފާހަގަކުރައްވައި ދިވެހިންގެ ތެރޭގައި މި އޮތް އެކުވެރިކަން ދަމަހައްޓަން މަސައްކަތް ކުރަންޖެހޭކަން ފާހަގަކުރެއްވިއެވެ.
ނައިބު ރައީސް ވިދާޅުވީ، ބައިބައިވުން އުފެދޭ ކަންކަމާއި ހަމަޖެހުން ގެއްލިދާފަދަ ކަންކަމާ ރުޅިވެރިކަން އުފެދޭ ކަންކަމާ ދުރުހެލިވާންޖެހޭ ކަމަށެވެ. އަދި ދިވެހިންނަކީ އިސްލާމްދީނުގެ ސައްހަ އަގީދާގެ މަތީގައި ތިބޭ އެކުވެރި ބައެއް ކަމަށާ، ދިވެހިންނަށް ލިބޭ ކާމިޔާބީގެ ނަތީޖާއަކީ ވެސް އެއީކަން އެމަނިކުފާނު ފާހަގަކުރެއްވިއެވެ.
އަމީނިއްޔާ ސްކޫލުގެ އަލިމަސް ޔޫބީލްގެ މި ހަރަކާތުގައި ބައިވެރިވުމުގެ ގޮތުން ނައިބު ރައީސް ވަނީ ޕެރޭޑުގެ ބައެއްގައި ބައިވެރިވެ ވަޑައިގެންފައެވެ. އަމީނިއްޔާ ސްކޫލުން އިންތިޒާމުކުރި މި ޕެރޭޑުގެ މަގްސަދަކީ އެ ސްކޫލުގެ އަލިމަސް ޔޫބީލް ކުލަގަދަކޮށް ފާހަގަކުރުމާއި އެ ސްކޫލަށް ނިސްބަތްވާ ހުރިހާ ފަރާތްތަކުގެ މެދުގައި ގުޅުންބަދަހިކޮށް އެކުވެރިކަން އާލާކުރުމެވެ. އަމީނިއްޔާ ސްކޫލުން އިންތިޒާމުކުރި މި ޕެރޭޑުގައި އެ ސްކޫލުގެ ސްޓާފުންނާއި މިހާރުގެ ދަރިވަރުންނާއި އިހުގެ ދަރިވަރުންނާއެކު ދެހާހެއްހާ ފަރާތުން ބައިވެރިވިއެވެ.
