މިއަދު ހަވީރު އަމީނިއްޔާ ސްކޫލުން އިންތިޒާމްކޮށްގެން ބާއްވާ ޕެރޭޑަށް ހުޅުމާލޭގެ ބައެއް މަގުތައް ބަންދު ކުރަން ނިންމައިފިއެވެ.
އަމީނިއްޔާ ސްކޫލުގެ ޑައިމަންޑް ޖުބްލީ ފާހަގަ ކުރުމުގެ ގޮތުން އެ ސްކޫލްގެ މުސްކުޅި ދަރިވަރުންނާ އެކުވެގެން ބާއްވާ މި ޕެރޭޑް ކުރިއަށް ދާނީ މިއަދު ހަވީރުއެވެ.
ފުލުހުން ބުނީ، މިއަދު އަމީނިއްޔާ ސްކޫލުގެ ޕެރޭޑް ހުޅުމާލޭގައި އޮންނާތީ ހަވީ 4:00 އިން އިރުއޮއްސި 6:00 އާ ދެމެދު ހުޅުމާލޭގެ ބައެއް މަގުތައް ބަންދުވާނެ ކަމަށެވެ. އެގޮތުން ޗަނބޭލީ މަގު، ފިލިގަސް މަގު، ކެނެރީމަގު، ކާނޭޝަން މަގު، ހަނދުވަރީ ހިނގުން، ހިތިގަސް މަގު އަދި ބަގީޗާ ހިނގުނުގައި ދުއްވާ އެއްޗެތި ދުއްވާ ފަރާތަކުން ސަމާލުވުމަށް ފުލުހުން ބުނެއެވެ.
އަމީނިއްޔާ ސްކޫލުގެ ޑައިމަންޑް ޖުބްލީ ޕެރޭޑް ފެށުމަށް ހަމަޖެހިފައިވަނީ ރެހެންދި ސްކޫލް ކުރިމަތިންނެވެ. އަދި މި ޕެރޭޑް ނިންމާނީ ސެންޓަރަލް ޕާކަށެވެ. މި ޕެރޭޑް ކުރިއަށް ދާއިރު 4 ސަރަހައްދެއްގައި މަޑުކުރާ ގޮތަށް ވަނީ ހަމަޖެހިފައެވެ. ޕެރޭޑް ފުރަތަމަ މަޑުކުރާނީ ރެހެންދި ސްކޫލް ކައިރިއަށެވެ. ދެވަނައަށް މަޑުކުރާނީ ގަވަމަންޓް ޕާކް ކުރިމައްޗަށެވެ. ތިންވަނައަށް މަޑުކުރަން ހަމަޖެހިފައި ވަނީ ސްޓޭޑިއަމް ކައިރިއަށް ކަމަށާ ހަތަރުވަނަ ސްޓޮޕަކީ ސެންޓްރަލް ޕާކެވެ.
އަމީނިއްޔާ ސްކޫލަކީ ރާއްޖޭގެ އެންމެ ދުވަސްވީ ސްކޫލްތަކުގެ ތެރެއިން ސްކޫލެކެވެ. ހަމައެކަނި އަންހެން ކުދިންނަށް ހާއްސަކޮށްގެން ހިންގި މި ސުކޫލަކީ މުޅި ގައުމަ ފަހުރުވެރިވާ އެތަށް ދަރިވަރުންނެއްގެ ތައުލީމީ ބިންގާ އަޅައި ދިން ސްކޫލެވެ. މިހާރު އަމީނިއްޔާގައި ދެ ޖިންސުގެ ކުދިން ކިޔަވަމުން ދާއިރު މިއަހަރު އަމީނިއްޔާ ސްކޫލުން ފާހަގަ މި ކުރަނީ 75 އަހަރު ފުރި ޑައިމަންޑް ޖުބްލީއެވެ. އެގޮތުން މިއަހަރުގެ އެކި ހިސާބުތަކުގައި މި މުނާސަބާއާ ގުޅުވައިގެން އެކި ކަހަލަ ޕްރޮގްރާމްތައް އެ ސްކޫލުން ދަނީ ހިންގަމުންނެވެ.
