މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ މެންބަރުކަމަށް ކުރިމަތިލާން ދެވަނަ ފަހަރަށް ހުޅުވާލައިފިއެވެ.
ރައީސްކަމުން މުހައްމަދު ޝަހީބު އިސްތިއުފާދެއްވުމާ ގުޅިގެން އެ ކޮމިޝަނުގެ ހުސްވެފައިވާ މަގާމަށް ކުރިމަތިލުމަށް ހުޅުވާލައިފައި ވަނީ މިއަދެވެ.
ރައީސް އޮފީހުން މިއަދު ކުރި އިއުލާނެއްގައި ބުނެފައި ވަނީ ބްރޯޑްކޮމް އިން މެންބަރަކު އިސްތިއުފާ ދެއްވާފައިވާތީ، ހުސްވެފައިވާ މަގާމަށް މެންބަރަކު އައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ.
އެ އިއުލާނުގައި ވަނީ މިއަދުން ފެށިގެން މި މަހުގެ 20 ގެ ނިޔަލަށް މެމްބަރު ކަމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށާއި ބްރޯޑްކޮމްއަށް އައްޔަނުކުރާ މީހާއަކީ އުމުރުން 18 އަހަރުވެފައިވާ ދިވެއްސަކަށް ވާންޖެހޭނެ ކަމަށެވެ. އަދި އެމީހަކީ އިސްލާމްދީނުގައި ހައްދެއް ކަނޑައެޅިފައިވާ ކުށެއް ނުވަތަ ހިޔާނާތުގެ ކުށެއް ކުރިކަން ވޭތުވެ ދިޔަ ފަސް އަހަރު ޝަރީއަތަށް ސާބިތުވެފައިނުވާ، ގާނޫނު އަސާސީ ނުވަތަ ގާނޫނެއްގެ ދަށުން އިންތިހާބުކުރެވިފައިވާ މަގާމެއްގައި ހުރި ފަރާތަކަށް ވެގެން ނުވާނޭ ކަމަށްވެސް އެ އިއުލާނުގައިވެއެވެ. މީގެ އިތުރުން ސިވިލް ސާވިސް ނުވަތަ ސަރުކާރު ހިއްސާވާ ކުންފުންޏެއްގެ ވަޒީފާއެއް އަދާކުރާ މީހުންނަށާއި ކޮމިއުނިކޭޝަނާއި ބްރޯޑްކާސްޓްކުރުމުގެ ދާއިރާގައި މާލީ މަސްލަހަތު އޮތް މީހުންނަށް އެ މަގާމަށް ކުރިމަތި ނުލެވޭނެ ކަމަށްވެސްވެއެވެ.
ބްރޯޑްކޮމް އިން ޝަހީބު އިސްތިއުފާދެއްވީ މި މަހުގެ 10 ވަނަ ދުވަހެވެ. ޝަހީބު އިސްތިއުފާ ދެއްވި އިރު، ބްރޯޑްކޮމްގެ ކޮމިޝަނުގެ ނައިބު ރައީސްގެ މަގާމުގައި ހުންނެވި ފާތިމަތު ޒައިނާ މަގާމުން ވަކިކުރަން ރައްޔިތުންގެ މަޖިލީހުން މިއަދު ވަނީ ފާސްކޮށްފައެވެ. އެހެންކަމުން އެ މަގާމު ވެސް މިހާރު ވަނީ ހުސްވެފައެވެ.
ޝަހީބާއި ޒައިނާ މަގާމުން ވަކިކުރުމަށް ނިންމާފައި ވަނީ ކުރީގެ ސަރުކާރުގެ ނުފޫޒު އޮތްކަމަށް ތުހުމަތުކޮށެވެ. އަދި އިންސާފުގެ ބޭރުން ބައެއް ޗެނަލްތައް ޖޫރިމަނާ ކުރުމުގެ ތުހުމަތުވެސް އެފަރާތްތަކުގެ މައްޗަށް ވަނީ ކޮށްފައެވެ. މިނިވަން މުއައްސަސާތަކާ ބެހޭ ކޮމިޓީގެ މީގެ ކުރީގެ ބައްދަލުވުމެއްގައި އެ ކޮމިޝަނުން ކަންކަން ކޮށްފައި ވަނީ އިންސާފުން ނޫން ކަމަށް އެފަރާތުން ވަނީ އިއުތިރާޒު ވެފައި ވެއެވެ.
މީގެކުރިން ވެސް ބްރޯޑްކޮމް އިން ދެ މެމްބަރަކު ވަނީ އިސްތިއުފާ ދެއްވައިފައެވެ. އެއީ ކޮމިޝަނުގެ ކުރީގެ މެމްބަރު އިސްމާއިލް ސޮފްވާން އާއި ހަސަން ނަބާހެވެ. އޭރު ހުސްވި ދެ މަގާމަށް ކުރިމަތި ލުމަށް ޖުލައި މަހު ވަނީ އިއުލާން ކޮށްފައެވެ. އެ މަގާމަށް އައްޔަން ކުރަން ރައީސް އިބްރާހިމް މުހައްމަދު ސޯލިހަށް ފެނިވަޑައިގަންނަވާ 36 މީހުންގެ ނަން ރައްޔިތުންގެ މަޖިލީހަށް އެމަނިކުފާނު ވަނީ ފޮނުއްވަވާފައެވެ.
