މޫސުމީ ނޭދެވޭ ބަދަލުތަކާ ކާރިސާތަކަށް އަހުލުވެރި އަދި އެފަދަ ކަމަކުން ފަސޭހައިން އަރައިގަނެވޭ ފަދަ މޭރުމަކުން އުމްރާނީ ތަރައްގީ ހާސިލުކުރުން މުހިންމު ކަމަށް އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް ވިދާޅުވެއްޖެއެވެ.
ބައިނަލްއަގުވާމީ ފެންވަރުގައި މިއަދު ފާހަގަކުރަމުންދާ ކާރިސާތަކުން ލިބޭ ގެއްލުން ކުޑަކުރުމުގެ ދުވަހުގެ މުނާސަބާއާއި ގުޅިގެން ދެއްވި ހާއްސަ މެސެޖުގައި ގުޓެރޭޒް ވިދާޅުވީ، ކްލައިމެޓް-ރެޒިލިއަންޓް ނުވަތަ މޫސުމީ ނޭދެވޭ ބަދަލުތަކާ ކާރިސާތަކަށް އަހުލުވެރި އަދި އެފަދަ ކަމަކުން ފަސޭހައިން އަރައިގަނެވޭ ފަދަ މޭރުމަކުން އުމްރާނީ ތަރައްގީ ހާސިލުކުރުމަށް އިންވެސްޓްކުރުން މުހިންމު ކަމަށެވެ. މި ބީދައިން އުމްރާނީ ތަރައްގީ ހާސިލުކުރުމަށް ޚަރަދު ކުރާ ކޮންމެ ޑޮލަރަކަށް 6 ޑޮލަރު ރައްކާކުރެވިގެންދާކަން ފާހަގަކުރައްވަމުން ގުޓެރޭޒް ވިދާޅުވީ މިކަމުގެ ސަބަބުން އިތުރު ވަޒީފާތަކެއް އުފެދި، ފައިސާ ރައްކާކުރެވިގެންދާނެ ކަމަށެވެ.
ދިރިއުޅުއްވުމުގައި މިހާ ހިސާބަށް ވަޑައިގެންނެވުނުއިރު، ކާރިސާތަކުގެ ސަބަބުން ބޮޑެތި ގެއްލުންތަކެއް ތަހައްމަލު ކުރި ގިނަ ސަރަހައްދުތަކަށް ދަތުރުކުރެއްވުނުކަން ފާހަގަކުރައްވަމުން ގުޓެރޭޒް ވިދާޅުވީ، މިފަދަ ހާދިސާތަކާ ކާރިސާތަކަކީ އެތައް އަހަރަކުން ހޯދި ތަރައްގީއާއި ކުރިއެރުންތައް ކުޑަ ވަގުތުކޮޅެއްގައި ނެތިކޮށްލާ ވަރުގެ ކަންތައްތަކެއް ކަމަށެވެ.
ކުރިއަށް އޮތް 10 ވަރަކަށް އަހަރު ދުވަހަށް ބަލާއިރު ބޯހިޔާ ވަހިކަމުގެ މަޝްރޫއާއި، ސްކޫލާ ހޮސްޕިޓަލާ އެނޫޏްވެސް އުމްރާނީ ބިނާވެށީގެ މަސައްކަތްތަކަށް މުޅި ދުނިޔެއިން އެތައް ޓްރިލިއަން ޑޮލަރެއް އިންވެސްޓްކުރާނެ ކަމަށާ، މިފަދަ އިންވެސްޓްމަންޓްތައް ބިނާ ކުރަންވާނީ މޫސުމީ ނޭދެވޭ ބަދަލުތަކަށް އަހުލުވެރި އަދި ކާރިސާތަކާ ހާދިސާތަކުން ލިބޭ ގެއްލުން ވީހާވެސް ކުޑަވާނެ މޭރުމަކުން ކުރާ ތަރައްގީއެއްގެ ތަސައްވުރުގައި ކަމަށްވެސް ގުޓެރޭޒް ވަނީ ވިދާޅުވެފައެވެ.
ބައިނަލްއަގުވާމީ ފެންވަރުގައި މިއަދު ފާހަގަކުރަމުންދާ ކާރިސާތަކުން ލިބޭ ގެއްލުން ކުޑަކުރުމުގެ ދުވަހުގެ މިއަހަރުގެ ޝިއާރު އަމާޒުކޮށްފައިވަނީ ނާޒުކުރު އުމްރާނީ ބިނާތަކަށް ލިބޭ ގެއްލުން ކުޑަކޮށް، ކާރިސާތަކުގައި އަސާސީ ހިދުމަތްތަކަށް ބުރުލެއް ނާރާނެކަން ކަށަވަރުކުރުމުގެ މައްޗަށެވެ.
