ބުރުކީނާ ފާސޯގެ އިރުމަތީ އަވަށެއް ކަމަށްވާ ސަލްމޯސީގެ މިސްކިތެއްގައި ނަމާދަށް ތިބި ބަޔަކަށް ބަޑިން ހަމަލާދީ 13 ވަރަކަށް މީހުން މަރާލައިފިއެވެ.
ބަޑި ހިފައިގެން ތިބި ބަޔަކު މިސްކިތު ތެރަށް ވަދެގެން ދިން މި ހަމަލާގައި މަރުވި މީހުންގެ ސީދާ އަދަދެއް އަދި ކަށަވަރެއް ނުވެއެވެ.
މި ހާދިސާގައި ޒަހަމްވި މީހުންގެ ތެރެއިން 2 މީހެއްގެ ހާލު ވަރަށް ސީރިއަސް ކަމަށް މައުލޫމާތު ލިބެއެވެ.
ސަލާމަތީ ބާރުތަކުން ހަރަކާތްތެރިވަމުން ދިޔަ ނަމަވެސް، މި ހަމަލާއާއިއެކު އެ އަވަށުގެ ގިނަ އަދަދެއްގެ ވަޒަންވެރިން ވަނީ، އެ ސަރަހައްދޫ ދޫކޮށް އެހެން ހިސާބުތަކަށް ބަދަލުވާންވެސް ފަށާފައެވެ.
ފާއިތުވީ އަހަރުތަކަށް ބަލާއިރު ބުރުކީނާ ފާސޯގައި ދޭ މިފަދަ ހަމަލާތައް ވަނީ އިތުރުވެފައެވެ. ބުރުކީނާ ފާސޯގައި މިފަދަ ހަމަލާތައް ދެމުންދަނީ ހަތިޔާރު އެޅި ހަނގުރާމަތެރި ޓެރަރިސްޓް ޖަމާއަތްތައް ކަމަށްވާ އަލް-ގައިދާއާއި އައިސިސްއާއި ގުޅުން އޮންނަ ގުރޫޕުތަކުންނެވެ.
އދގެ ތަފާސް ހިސާބުތަކަށް ބަލާއިރު ބުރުކީނާ ފާސޯގައި ހިންގަމުންދާ ހަމަނުޖެހުންތަކުގެ ސަބަބުން 500000 އެއްހާ މީހުންގެ ގެދޮރު ގެއްލިފައިވާއިރު، 1.5 މިލިއަން މީހުން ތިބީ އިންސާނީ ކާރިސާއެއްގެ ތުންފަތް މަތީގައެވެ.
