ބޮލީވުޑްގެ މޫނުމަތި ބަދަލުވަމުން އަންނަ ކަމަށާ އެ ފުރުސަތު ފަހިވެގެންދިޔައީ ފިލްމް ޕްރޮޑިއުސަރުންނާ އޯޑިއަންސްވެސް އެކަމަށް ތައްޔާރުވުމުން ކަމަށް އަރަމުން އަންނަ ޒުވާން ބޮލީވުޑް ތަރި ކުނާލް ކަޕޫރު ބުނެފިއެވެ.
އިންޑިއާގެ ފިލްމީ ސިނާއަތާ ބެހޭ ގޮތުން ވާހަކަ ދައްކަމުން ކުނާލް ކަޕޫރު ބުނީ، ބޮލީވުޑްގެ އުފެއްދުންތަކުގެ ސްޓައިލް ބަދަލުވަމުން އަންނަނީ މައިގަނޑު 2 ސަބަބަކާއި ހެދި ކަމަށެވެ. ފުރަތަމަ ސަބަބަކީ، ތަފާތު އެކި ކަހަލަ ވާހަކަތައް ބަލައިގަތުމަށް އޯޑިއަންސް ތައްޔާރަށް އޮތުމާ، އެފަދަ އުފެއްދުންތައް ތަޖުރިބާކުރުމަށް ޕްރޮޑިއުސަރުންނާ އެކްޓަރުންނާ ޑައިރެކްޓަރުންވެސް ތައްޔާރަށް އޮތުން ކަމަށް ކުނާލް ކަޕޫރު ބުނެއެވެ. ދެވަނަ ސަބަބަކީ ދުނިޔޭގެ އެކި ހިސާބުތަކުގެ ތަފާތު އުފެއްދުންތަކަށް އޯޑިއަންސްއާއި ފިލްމް އުފައްދާ ފަރާތްތައް ހުށަހެޅިފައި އޮތުމުން، ތަފާތު ގޮތްގޮތަށް ސްކްރީނާ ހަމައަށް ވާހަކަ ގެނެސްދިނުމަށް ފުރުސަތު ތަނަވަސްވެގެން ދިއުން ކަމަށްވެސް ކުނާލް ކަޕޫރު ސިފަކުރެއެވެ.
ކުނާލް ކަޕޫރުގެ އެކްޓިންގް އެންމެ އަވަހަށް ފެނިގެންދާނީ ފިލްމު އުފެއްދުމުގެ ދާއިރާއާއި މުޅިން އަލަށް ގުޅުނު އަމީން ހާޖީގެ ސައިކޮލޮޖިކަލް ތްރިލާ "ކޮއި ޖާނޭ ނާ"އިންނެވެ.
