މުދައްރިސުންނަކީ ދަރިވަރުންގެ ހިތްތަކުގައި އިސްލާމީ ރިވެތި އަހްލާގް ޒީނަތްތެރިކުރާ ބަޔަކީ މުދައްރިސުން ކަަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ބައިނަލްއަގްވާމީ ގޮތުން ފާހަގަކުރާ މުދައްރިއްސުންގެ ދުވަހާ ގުޅިގެން ފައިސަލް މިއަދު މުދައްރިސުންނަށް ތަހުނިޔާ ކިޔުއްވާ ޓްވީޓެއް ކުރައްވާފައެވެ. ފައިސަލް ނަސީމް ވިދާޅުވީ، ދަރިވަރުން އަމިއްލަ ނަފްސަށް ކުރާ އިތުބާރު އިތުރުކޮށް، އިސްލާމީ ރިވެތި އަހްލާގް ޒީނަތްތެރިކުރާ ބަޔަކީ މުދައްރިސުން ކަމަށެވެ. އަދި އެ ދަރިވަރުންނަކީ އިލްމީ ހުނަރުލިބިގެންވާ ބަޔަކަށް ހެދުމަށް މުދައްރިސުން ކުރާ ބުރަ މަސައްކަތް ބަލައިގަންނަ ކަމަށާއި އެ ކަމަށް ފައިސަލް ވަނީ ޝުކުރު އަދާކުރައްވާފައެވެ.
މި އަހަރުގެ މުދައްރިސުންގެ ދުވަހަށް ޔުނެސްކޯއިން ކަނޑައަޅާފައިވާ ޝިއާރަކީ "ޒުވާން މުދައްރިސުން: ތައުލީމީ ދާއިރާގެ ކުރިމަގު" މިއެވެ.
މިއަދު ގެ މުނާސަބާއާ ގުޅިގެން ރައީސްގެ ހިތާބުގައި ތައުލީމީ މުއައްސަސާތަކުގެ ކާމިޔާބީ ވަޒަންކުރާ ހަމައެކަނި މިންގަނޑަކީ، ދަރިވަރުން ހާސިލުކުރާ މަތީ ދަރަޖައިގެ ސަނަދުތަކެއް ނޫންކަން ފާހަގަކުރައްވާފައި ވެއެވެ. އޭގެ ބަދަލުގައި ކާމިޔާބަކީ، އެތަންތަނުން ދަސްވެނިވާ ދަރިވަރުންގެ ކިބައިގައި އުފެދޭ ޝަހްސިއްޔަތުގެ ހަރުދަނާ ކަމާއި އެދަރިވަރުން އަނެކުންނާ މުއަމަލާތުކުރާ ގޮތާއި ގައުމުގެ ކަންކަމުގައި އިސްނަގަން ކެރޭ މިންވަރާއި ގޮންޖެހުންތަކާ ކުރިމަތިލުމުގައި ހުންނަ ހުޝިޔާރު ކަންފަދަ ކަންތައްތައްކަމަށް ރައީސް ސޯލިހްގެ ހިތާބުގައި ފާހަގަކުރައްވާފައި ވެއެވެ. އެހެންކަމުން މުދައްރިސުންގެ ދުވަހެއް ފާހަގަކުރާއިރު، ތައުލީމީ ކޮންމެ މުއައްސަސާއަކުން ވެސް އެންމެ ބޮޑު އިސްކަމެއް ދޭންވީ، އެފަދަ ދަރިވަރުންތަކެއް އުފެއްދުމަށްކަމުގައި ރައީސް ސޯލިހް ވިދާޅުވެފައިވެއެވެ.
ރަޢިސް ސޯލް ވަނީ ރާއްޖޭގެ ހުރިހާ މުދައްރިސުންނަށް، ދުވަހުގެ ހެޔޮއެދުމާއި ތަހުނިޔާ ފޮނުއްވާފައެވެ. އަދި އެމަނިކުފާނު ވަނީ ރާއްޖޭގެ ތައުލީމީ ދާއިރާގައި މަސައްކަތް ކުރައްވާ ހުރިހާ މީހުންނަށާއި، މުދައްރިސުން ބިނާކުރެއްވުމުގެ ބުރަ މަސްއޫލިއްޔަތު އަދާކުރައްވާ އެންމެހައި މީހުންނަށް ވެސް، ޓީޗަރުންގެ ދުވަހުގެ ތަހުނިޔާ އާއި ހެޔޮއެދުންތައް ފޮނުއްވާފައެވެ.
