މާލެއިން ހުޅުމާލެއަށް ބާރު ސްޕީޑެއްގައި ދިޔަ ކާރެއް ހައިވޭގެ އަރިމަތީ ފެންސްގައި ޖެހި އެކްސިޑެންޓެއް ހިނގައިފިއެވެ.
ފުލުހުން ބުނީ، މިއަދު ހެނދުނު 07:30 ހާއިރު ފުލުހުންނަށް މި މައްސަލަ ރިޕޯޓުކޮށްފައިވާ ކަމަށެވެ.
މި އެކްސިޑެންޓް ހިނގާފައިވަނީ މާލެއިން ހުޅުމާލެއައް ބާރު ސްޕީޑެއްގައި ދުއްވާފައިދިޔަ ކާރެއް، ހައިވޭ ނިމޭހިސާބުގައި މަސައްކަތްކުރަން ޖަހާފައިވާ ކޯން ތަކުން ނެއްޓެން އުޅުމުގެ ތެރޭގައި އަރިމަތީ ދަގަނޑު ފެންސްގައި ޖެހިގެން ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، މި އެކްސިޑެންޓްގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށެވެ. ނަމަވެސް ކާރުގެ ކުރީބައި އެއްކޮށް ވަނީ ހަލާކުވެފައި ކަމަށް ފުލުހުން މައުލޫމާތު ދެއެވެ. މި ހާދިސާ ފުލުހުން ތަހުގީގު ކުރަމުންދާއިރު، މި ހާދިސާގައި ހިމެނޭ އުޅަނދު ދުއްވި މީހާގެ އަތުގައި އެއްގަމު އުޅަނދު ދުއްވުމުގެ ލައިސެންސް އޮންނަ ކަމަށް ފުލުހުން ބުނެއެވެ.
މާލެއާއި، ހުޅުމާލެ ގުޅުވާ، އަޅާފައިވާ ބްރިޖާއި ހައިވޭއަށް އެއް އަހަރު ވެފައިވާއިރު، މާލެ ސަރަހައްދުގައި ހިނގާ ގިނަ އެކްސިޑެންޓްތައް ހިނގަނީ ބްރިޖާއި ހައިވޭގައެވެ. އެގޮތުން، މިދިޔަ ސެޕްޓެމްބަރު މަހުގެ 24 ވަނަ ދުވަހު، ހައިވޭގައި 3 ކާރު ޖެހި އެކްސިޑެންޓެއް ހިނގާފައި ވެއެވެ. މި އެކްސިޑެންޓް ހިނގީ މާލެއިން ހުޅުމާލެއަށް ދިޔަ ކާރެއް ހައިވޭގައި ކުއްލިއަކަށް މަޑު ކުރުމުން ފަހަތުން އައި ދެ ކާރު ކޮންޓްރޯލް ނުވެގެން ގޮސް ފުރަތަމަ އައި ކާރުގައި ޖެހިގެންނެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.
