ނިއު ޒީލަންޑްގެ ކްރައިސްޓްޗާޗްގެ 2 މިސްކިތެއްގައި ނަމާދަށް ތިބި ބަޔަކަށް ބަޑިން ހަމަލާދީ 51 މީހުން މަރާލި އޮސްޓްރޭލިއާގެ ޓެރަރިސްޓް ބްރެންޓަން ޓެރަންޓްއާއި ދެކޮޅަށް ކުރާ ދައުވާގެ ޝަރީއަތުގެ އަޑުއެހުންތައް އޯކްލަންޑަށް ބަދަލުކުރުމަށް އޭނާ ކުރި މަސައްކަތް ހުއްޓާލާ، އެ ޝަރީއަތް، ސީދާ ކްރައިސްޓްޗާޗުގައި ކުރިއަށް ގެންދިއުމަށް ހަމަޖެހުމާއެކު، އޭނާގެ ހަމާލަގެ ޝިކާރައަކަށްވީ މީހުންގެ އާއިލާތަކުން އެކަމާ އުފާފާޅުކުރަން ފަށައިފިއެވެ.
ޓެރަންޓްއާއި ދެކޮޅަށް ނިއު ޒީލަންޑްގައި ހިންގާ ޝަރީއަތުގެ އިބްތިދާއީ އަޑުއެހުމެއް މިއަދު ހެނދުނު ވަނީ ކުރިއަށް ގެންގޮސްފައެވެ. އޭނާއާއި ދެކޮޅަށް ހިންގާ ޝަރީއަތް ނޯތް އައިލަންޑްގެ އޮކްލަންޑްއަށް ބަދަލުކުރުމަށް މިދިޔަ އޯގަސްޓް މަހު ޓެރަންޓް ހުށަހެޅި ހެށަހެޅުން އަނބުރާ ގެންގޮސް، ސައުތު އައިލަންޑްގެ ކްރައިސްޓްޗާޗްގައި ޝަރީއަތް ކުރިއަށް ގެންދިއުމަށް ހަމަޖެހިފައިވާކަން ފަނޑިޔާރު ކެމެރަން މެންޑޯ ވަނީ އިއުލާންކުރައްވާފައެވެ.
މި ނިންމުން ނިންމާފައިވަނީ ކޮން ސަބަބަކާއި ހެދި ކަމެއް އަދި ހާމަކޮށްފައެއް ނުވެއެވެ.
ކަންމިހެން އޮތް އިރު ޓެރަންޓް އަދިވެސް ދަނީ ޓެރަރިޒަމްގެ އަމަލެއް ހިންގާ، ގަސްތުގައި 51 މީހުން މަރާލި ކަމުގެ މައްޗަށް އޭނާއާއި ދެކޮޅަށް އުފުލާފައިވާ ދައުވާއަށް އިންކާރު ކުރަމުންނެވެ. ޝަރީއަތުގެ އަޑުއެހުންތަކުގައި ޓެރަންޓް ބަޔާން ދެމުންދަނީ އޯކްލަންޑްގައި މިވަގުތު އޭނާ ހައްޔަރުކޮށްފައި ހުރި ހައި-ސެކިއުރިޓީ ޖަލުގެ ގޮޅީގައި އިނދެ، ވީޑިއޯ ކޮންފަރެންސް މެދުވެރިކޮށެވެ. ޝަރީއަތުގެ އަޑުއެހުންތައް ކުރިއަށްދާ ވަގުތު ޓެރަންޓް ފެންނަ މަންޒަރުގެ ފޮޓޯ ނެގުން އޮންނަނީ މަނާކޮށްފައެވެ.
މާޗް 15 ވަނަ ދުވަހުގެ ހަމަލާތަކާ ގުޅިގެން ޓެރަންޓްއާއި ދެކޮޅަށް ކުރާ ޝަރީއަތުގެ މަޖިލީސް ފަށާނީ 2020 ވަނަ އަހަރުގެ ޖޫން މަހުގެ 2 ވަނަ ދުވަހުއެވެ.
