އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ މަރާލި މީހުންނާއި އެކަން ރޭވި މީހުން ވަރަށް އަވަހަށް އާންމު ކުރައްވާނެ ކަމަށް، ގެއްލުވާލާފަިއވާ މީހުންނާއި މަރާލާފައިވާ މީހުންގެ މައްސަލަތައް ބަލާ ކޮމިޝަންގެ ރައީސް ހުސްނުއްސުއޫދު ވިދާޅުވެއްޖެއެވެ.
ސުއޫދު ވިދާޅުވީ، ޑރ. އަފްރާޝީމް އަވަހާރަކޮށްލި މީހުންގެ މައުލޫމާތު ކުރިއަށް އޮތް ހަފްތާތަކުގެ ތެރޭގައި އާންމު ކުރާނެ ކަމަށެވެ. ސުއޫދު މިހެން ވިދާޅުވީ، ޑރ. އަފްރާޝީމް އަލީ އަވަހާރަކޮށްލައިގެން މިހާތަނަށް ހިންގި ތަހުގީގުތަކުން އެއްވެސް ނަތީޖާއެއް ނެރެވިފައި ނުވާތީ ދެން ވެސް އިންސާފު ލިބިދާނެ ކަމަށް ގަބޫލު ނުކުރެވޭ ކަމަށް އޭނާގެ އާއިލާ އިން ބުނުމާއި ގުޅިގެންނެވެ.
ޑރ. އަފްރާޝީމްގެ މަރަށް އިންސާފު ހޯދައިދިނުމަކީ މި ސަރުކާރުގެ ވައުދެކެވެ. މަރުތަކުގެ ހަގީގަތް ހޯދުމަށް ރައީސް އިބްރާހިމް މުހައްމަދު ސޯލިހް އުފެއްދެވި ރިޔާސީ ކޮމިޝަނުން ބުނެފައިވާ ގޮތުގައި އަފްރާޝީމްގެ މަރުގެ ފަހަތުގައި ވެސް ތިބި މީހުން މިހާރު ހޯދާފައިވާ ކަމަށެވެ. އަދި އެ ތަހުގީގާ ގުޅޭ ރިޕޯޓެއް ރައީސް ސޯލިހާ މިހާރު ހިއްސާކޮށްފައިވާ ކަމަށެވ ވެސް ކޮމިޝަނުން ވަނީ ބުނެއެވެ.
އަފްރާޝީމް އަވަހާރަކޮށްލީ 2012 ވަނަ އަހަރު ސެޕްޓެމްބަރު 30 ވަނަ ދުވަހުގެ ރޭ 1:30 ހާއިރު، ދިރިއުޅޭ ހ. ފުންވިލުގެ ސިޑިގޮޅި ކައިރީގައި ކަތިވަޅި އަކުން ބޮލާއި ގައިގެ އެކި ތަންތަނަށް ހަމަލާދީއެވެ.
