ރައީސް އިބްރާހިމް މުހައްމަދު ސޯލިހްގެ އަރިހަށް އިންޑިއާގެ ޗީފް އޮފް ސްޓާފް ކޮމެޓީގެ ޗެއާމަން، އިންޑިއާގެ އަސްކަރިއްޔާގެ ޗީފް އޮފް އާމީ ސްޓާފް، ޖެނެރަލް ބިޕިން ރާވަތު، މިއަދު އިހްތިރާމުގެ ޒިޔާރަތެއް ކުރައްވައިފިއެވެ.
މިއަދު ހެނދުނު ރައީސް އޮފީހުގައި ބޭއްވި މި ބައްދަލުކުރެއްވުމުގައި، ރައީސް ސޯލިހް ވަނީ އިންޑިޔާގެ ޗީފް އޮފް އާމީ ސްޓާފްއާ، އެމަނިކުފާނުގެ ޑެލިގޭޝަނުން ރާއްޖެއަށް ޒިޔާރަތްކުރެއްވީތީ އުފާކުރައްވާކަމަށް ވިދާޅުވެ ޗީފް އޮފް އާމީ އާއި ޑެލިގޭޝަނަށް ޝުކުރު އަދާކުރައްވާފައެވެ. އަދި މިބައްދަލުކުރެއްވުމުގައި ދެ ބޭފުޅުން ވަނީ ދެ ގައުމުން އެންމެ އިސްކަންދޭ ކަންކަމާ ބެހޭގޮތުން މަޝްވަރާކުރައްވާފައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ސޯލިހް ވަނީ ދެގައުމުގެ މެދުގައި އޮތް ގާތް އެކުވެރި ގުޅުން ފާހަގަކުރައްވާފައެވެ. އަދި ހާއްސަކޮށް އިންޑިޔާގެ ބޮޑުވަޒީރު ނަރަންދުރަ މޯދީގެ ޒައާމަތުގައި ރާއްޖެއާ އިންޑިޔާގެ ގުޅުން އިތުރަށް ބަދަހި ވެފައިވާކަމަށާއި އިންޑިޔާގެ ބޮޑުވަޒީރު ދާދިފަހުން ރާއްޖެއަށް ކުރެއްވި ފުރަމާނަ ދަތުރުފުޅަކީ މީގެ ހެއްކެއްކަމުގައި ރައީސް ސޯލިހް ވިދާޅުވިއެވެ.
މީގެ އިތުރުން ރައީސް ވަނީ، އިންޑިޔާކަނޑުގެ ސަލާމަތާއި ރައްކާތެރިކަން ކަށަވަރުކުރުމާއި، ނިރުބަވެރިކަމާ ދެކޮޅަށް ދެ ގައުމު ގުޅިގެން ކުރަމުންގެންދާ މަސައްކަތްތައް ފާހަގަކުރައްވައި، ހާއްސަކޮށް ދިފާއީ ކަންކަމާއި ސަލާމަތީ ކަންކަމުގައި އިންޑިޔާއިން ވެދެއްވާ އެހީތެރިކަން ފާހަގަކުރައްވައި އިންޑިޔާ ސަރުކާރަށް ޝުކުރު އަދާކުރައްވާފައެވެ.
މި ބައްދަލުކުރެއްވުމުގައި އިންޑިއާގެ ޗީފް އޮފް އާމީ ސްޓާފް ދެއްކެވި ވާހަކަފުޅުގައި، އެމަނިކުފާނާއި އެމަނިކުފާނުގެ އަރިހުގައި ވަޑައިގެންނެވި ޑެލިގޭޝަނަށް ރާއްޖެއިން ހޫނުމަރުހަބާއެއް ވިދާޅުވެ، ބެހެއްޓެވި ގާތްކަމާއި އަދާކުރެއްވި މެހުމާންދާރީއަށްޓަކައި ދިވެހި ސަރުކާރާއި ރައީސް ސޯލިހަށް ޝުކުރު އަދާކުރެއްވިއެވެ.
