ދަތުރުފަތުރުގެ ބްރޭންޑްތަކުގެ ވާހަކަ ދައްކާއިރު އިނގިރޭސިވިލާތުގެ ޓުއާ އޮޕަރޭޓާ ކުންފުނި ތޯމަސް ކުކްގެ ނަމަކީ ލިސްޓުގެ އެންމެ ކުރިން ޖާގަ ހޯދަމުންދިޔަ ނަމެކެވެ. މީގެ 178 އަހަރުކުރިން އޮޕަރޭޓްކުރަން ފެށި ތޯމަސް ކުކް ޓުއާ އޮޕަރޭޓާ ކުންފުންޏަކީ ދަތުރުފަތުރުގެ ސިނާއަތުގެ އެންމެ ޒަމާންވީ އެއް ބްރޭންޑު ކަމުގައި ވީ ނަމަވެސް، އެ ކުންފުނީގެ އެންމެ ފަހު ވިޔަފާރި ހޯމަ ދުވަހު ވަނީ ބަންދުކޮށް، ހުއްޓާލާފައެވެ.
އަހަރަކު 19 މިލިއަނެއްހާ ކަސްޓަމަރުންނަށް ހިދުމަތްދެމުންއައި ތޯމަސް ކުކް ކުންފުނިންވަނީ އެކުންފުނީގެ އެސެޓްތައް ލިކިއުޑޭޓްކޮށް، ކުންފުނި ބަނގުރޫޓުވެއްޖެކަން ރަސްމީކޮށް ކަނޑައެޅުމަށް ނިންމާފައިވާކަން އިއުލާންކޮށްފައެވެ.
މިހާލަތަށް ދިޔަ ނުދީ ކުންފުނި ނެގެހެއްޓުމަށް ކުރަމުންދިޔަ މަސައްކަތްތަކާއެކުވެސް ކުންފުނި ބަނގުރޫޓުވެ އެންމެ ފަހުގެ ވިޔަފާރިވެސް ބަންދުކޮށްފައިވާއިރު ތޯމަސް ކުކް ކުންފުނީގެ ދަރަނި 1.7 ބިލިއަން ޕައުންޑް ނުވަތަ ގާތްގަނޑަކަށް 2.1 ބިލިއަން ޑޮލަރަށް އަރާފައިވާކަމަށް އެ ކުންފުނީގެ ޗީފް އެގްޒެކެޓިވް ޕީޓާ ފްރޭންކްހޯޒާ ވަނީ ހާމަކޮށްފައެވެ.
ތޯމަސްކުކްގެ އޮޕަރޭޝަންތައް މުޅިން ހުއްޓާލާފައިވާއިރު އެކަމުގެ އަސަރު، ދުނިޔޭގެ އެކި ކަންކޮޅުތަކަށް ދަތުރުކޮށް އަދިވެސް ދަތުރުމަތީގައި ތިބި 6 ލައްކައެއްހާ ކަސްޓަމަރުންނަށް ވަނީ ސީދާ ގޮތުން ފޯރާފައެވެ. މީގެ އިތުރުން އެ ކުންފުނީގެ 20000 މުވައްޒަފުން މިއަދު ތިބީ ވަޒީފާއެއް ނެތް މީހުންގެ ގޮތުގައެވެ. ވީއިރު އުފެދޭ ސުވާލަކީ، ދަތުރުކުރުމަށް މުޅި ދުނިޔެ ކެތް މަދުވެފައި އޮތް ދަނޑިވަޅެއްގައި ތޯމަސް ކުކް ފަދަ ތަޖުރިބާކާރު ކުންފުންޏެއް މިދަރަޖައަށް ވެއްޓުނީ ކީއްވެގެންތޯ ކުރެވޭ ސުވާލެވެ. ދަތުރު ގެންދާ ތަކެތި ޕެކްކުރުމަށް ކުންފުންޏާ ގުޅާލުމުން ހުރުމާ ކެއުމުން ފެށިގެންގޮސް ފްލައިޓްގެ ހުރިހާ ކަމެއްވެސް ހަމަޖައްސާ ދެމުންދިޔަ މާ ސިންގާ ތޯމަސް ކުކް ކުންފުނި އިނދަޖެހުނީ ކީއްވެތޯ ކުރެވޭ ސުވާލެވެ.
މިއަހަރުގެ ހޫނު މޫސުމުގެ ދުވަސްވަރާ ހިސާބަށް އައިއިރުވެސް ތޯމަސް ކުކް ކުންފުނިން ދިޔައީ ދުނިޔޭގެ 82 މަންޒިލަކަށް ފަތުރުވެރިން ގޮވައިގެން ދަތުރުކުރަމުންނެވެ. މި ކުންފުނީގެ ހާހަކަށްވުރެ ގިނަ ފްލައިޓް ދަތުރުދުވާލެއްގެ މައްޗަށް ކުރިއެވެ. ޓްރެވެލް އޮޕަރޭޓަރެއްގެ ގޮތުގައި އެތައް ހާސް ބަޔަކަށް ހިދުމަތްދެމުންދިޔައެވެ. ކޮންމެ ކަސްޓަމަރެއްގެ ރިވިއުވެސް ލިބެމުންދިޔައީ އެދެވޭ މޭރުމަކުންނެވެ. އެހެންވީއިރު، ޖެހުނު މައްސަލައަކީ ކޮބައި ހެއްޔެވެ
އިންޓަނެޓް
އަދުގެ ޒަމާނަކީ އިންޓެންޓްގެ ޒަމާނެވެ. ދަތުރުކޮށް އުޅުމުގެ ހުރިހާ އިންތިޒާމެއްހެން ހަމަޖައްސަމުން ދަނީ އިންޓެނެޓުންނެވެ. ރާއްޖެއަށް ބަލާއިރު، އެންމެ ކުޑަމިނުން ޓެކްސީގަނޑެއް ހޯދަންވެސް މިހާރު ގިނަ މީހުން ބަރޯސާވަނީ ކޮންމެވެސް އޮންލައިން އެޕްލިކޭޝަނަކަށެވެ. ކަންމިހެން އޮތް ނަމަވެސް، ތޯމަސް ކުކް ކުންފުނި އިންޓެނެޓާ މާ ރައްޓެއްސެއް ނުވިއެވެ. ވިޔަފާރި ފުޅާކުރަމުންދިޔައީ ފިހާރަތަކާ ފޯނުކޯލު މެދުވެރިކޮށް ޓުއާ އޮޕަރޭޓިންގް ހިދުމަތް ދިނުމުގެ ވައްޓަފާޅިއަށެވެ. ދުނިޔޭގެ އެކި ކަންކޮޅުތަކުގައި މިހާތަނަށް 600 އެއްހާ އައުޓްލެޓް ފިހާރައިގެ ގޮތުގައި ހިންގަމުންދިޔައެވެ. އިންޓަނެޓާ ބީރައްޓެހި ކުންފުންޏެއްގެ ގޮތުގައި ތޯމަސް ކުކް ކުންފުނިން ޓުއާ އޮޕަރޭޓިންގްގެ ދާއިރާގައި ދެމި އޮތުމަށް މަސައްކަތް ކުރުމަކީ ހެދުނު އެންމެ ބޮޑު ގޯހެވެ.
ޕެކޭޖު ޓުއާ
ތޯމަސް ކުކްއަކީ އެއާލައިންއިން ފެށިގެން ގޮސް ހޮޓާވެސް ހިންގަމުންދިޔަ ފުޅާ ވިޔަފާރިއެކެވެ. ނަމަވެސް އަދުގެ ޒަމާނީ ޓުއާ ޕެކޭޖުތަކަކީ އެ ކުންފުނިން ބަލައިގަތް ފަލްސަފާއަކަށް ނުވިއެވެ. ކަންމިހެން އޮތްއިރު ޓްރެވެލް މާކެޓް އޮތީ ޓުއާ ޕެކޭޖުތަކަށެވެ. ކުޑަ ހަރަދަކުން ދަތުރުގެ ހުރިހާ ކަމެއް ފަރުޖައްސާލެވޭ ޕެކޭޖުތައް އިތުރުވަމުންދިޔަ ވަރަކަށް، ތޯމަސް ކުކް ފަދަ ވަރުގަދަ ކުންފުނިތަކުގެ ބޭނުން ކެނޑެމުންދިޔައެވެ. އެކަމަށް ކުންފުނިން ކަމެއްވެސް ނުކުރިތާ މާ ބޮޑު ފަރުވާލެއްވެސް ނުބެހެއްޓީއެވެ. އެއާބީއެންބީ ފަދަ ހިދުމަތްތަކާއެކު، ދަތުރުކުރަން ބޭނުންވާ މީހާއަށް އޭނާގެ އަމިއްލަ ޕެކޭޖުތައް ރާވާލެވޭ ގޮތް މަގުފެހުވުމާއެކު ތޯމަސް ކުކް ފަދަ 'މުސްކުޅި' އުސޫލަށް ބަރޯސާވެގެން އޮތް ކުންފުނީގެ ކުރިމަގު ބަނަވީއެވެ.
އެއާލައިން އޮޕަރޭޝަން
އެއާލައިން އޮޕަރޭޝަންގެ ވިޔަފާރިއަށް ތޯމަސް ކުކް ކުންފުނިން ވަންނަން ފެށީ އާ ސާސްކަފުގެ ފެށުމާ ދާދިއެކު އެކީގައެވެ. ފުރަތަމަ ދުވަސްކޮޅު އޮޕަރޭޓްކުރަމުންދިޔައީ ކޮންޑޯގެ ސަބްސިޑަރީ އެއާލައިނެއްގެ ގޮތުގައެވެ. އަދި 2003 ވަނަ އަހަރު އަމިއްލަ އެއާލައިނެއް ތައާރަފުކުރިއެވެ. 82 މަންޒިލަކަށް 34 މަތިންދާބޯޓުގައި ދަތުރުކުރަމުންދިޔައެވެ.
ޓްރެވެލް އޭޖެންސީއަކާ އެއާލައިނެއް އޮޕަރޭޓްކުރުމަކީ ހީކުރާހާ ފަސޭހަ ކަމެއް ނޫނެވެ. ޓްރެވެލް އޭޖެންސީ ކިތަންމެ ކާމިޔާބުވިއަސް އެއާލައިން ވިޔަފާރި ބަނގުރޫޓުވެދާނެއެވެ. މިއީ ވަކި 2 ވިޔަފާރިއަކަށްވާއިރު، އެއް ކުންފުންޏަކުން މިކަންކުރުމުން ހީނުކުރާ ވަރުގެ އަނދަވަޅަކަށް ވެއްޓުމުގެ ފުރުސަތު ބޮޑު ކަމަށް ވިޔަފާރިއާއި އިގުތިސޯދުގެ ތަޖުރިބާކާރުން އިއްތިފާގުވެއެވެ.
ބަންގުރޫޓުވިއިރު ތިބި ކަސްޓަމަރުންނަށް ހަދާނީ ކިހިނެއް؟
ތޯމަސް ކުކް ކުންފުނީގެ ހުރިހާ އޮޕަރޭޝަންތަކެއް ހުއްޓާލިއިރު ދުނިޔޭގެ އެކި ކަންކޮޅުތަކަށް ދަތުރުފެށި 6 ލައެއްކައެއްހާ ކަސްޓަމަރުން އެބަތިއްބެވެ. މިހާތަނަށް ހަދާފައިވާ ދަތުރު ތާވަލަށް ބަލާއިރު އެންމެ ފަހު ކަސްޓަމަރުންގެ ދަތުރުތައް އޮތީ އޮކްޓޯބަރު މަހުގެ 6 ވަނަ ދުވަހުއެވެ. އެހާތަނާ ޖެހެންދެކަށް ކަސްޓަމަރުންގެ މަންޒިލްތަކަށް އެ މީހުން އަނބުރާ ގެންދިއުމުގެ މަސައްކަތް ކުރަމުންދާނީ ޗާޓަރު ކުންފުނިތަކުގެ އެހީތެރިކަމާއެކުގައި ކަމަށް ޚަބަރު ލިބެއެވެ.
އެކި ގައުމުތަކުން ދަނީ އެގައުމުތަކުގައި ތިބި ތޯމަސް ކުކްގެ ކަސްޓަމަރުންނަށް އެއްބާރުލުމާ އެހީތެރިކަން ފޯރުކޮށްދެމުންނެވެ.
