އެއް އަހަރު ދުވަހުގެ މުހުލަތަކަަށް ބަންގްލަދޭޝްއިން ރާއްޖެއަށް މަސައްކަތްތެރިން އެތެރެ ކުރުން މިނިސްޓްރީ އޮފް އިކޮނޮމިކް ޑިވެލޮޕްމަންޓުން މަނާކޮށްފިއެވެ.
ބަންގުލަދޭޝް މަސައްކަތްތެރިން ރާއްޖެ ގެނެއައުން މަނާކޮށް އެކަން އިއުލާން ކުރެއްވީ އިކޮނަމިކް މިނިސްޓަރު ފައްޔާޒް އިސްމާއިލްއެވެ. މިނިސްޓަރު ފައްޔާޒް ވިދާޅުވީ މި ނިންމުމުގެ ސަބަބުން ކުރިޔަށް އޮތް އަހަރު ދުވަހުގެ ތެރޭގައި ބަންގްލަދޭޝްއިން އެއްވެސް ކަހަލަ ތަމްރީން ލިބިފައި ނުވާ އެއްވެސް މަސައްކަތު މީހަކު ރާއްޖެ އެތެރެއެއް ނުކުރާނެ ކަމަށެވެ.
ބަންގުލަދޭޝުން ރާއްޖެއަށް މަސައްކަތު މީހުން ގެނައުން މަނާކޮށްފައިވަނީ، ރާއްޖެއަށް ބިދޭސީ މަސައްކަތު މީހުން އަންނަ ކޮންމެ ގައުމަކަށް ވެސް އަންސްކިލްޑް މަސައްކަތްތެރިންގެ ކޯޓާއެއް ކަނޑައެޅުމަށް ފަހުގައެވެ. އެގޮތުން އަންސްކިލްޑް މަސައްކަތްތެރިންނަށް ކޮންމެ ގައުމަކަށް ކަނޑައެޅިފައިވާ ކޯޓާއަކީ ކޮންމެ ގައުމަކަށް 150،000 މަސައްކަތްތެރިންނެވެ.
މިނިސްޓަރު ފައްޔާޒު ވިދާޅުވީ ގަވާއިދާ ހިލާފަށް އުޅޭ ބިދޭސީ މަސައްކަތްތެރިންނާއެކު މިހާރުވެސް، ރާއްޖޭގައި ބަންގްލަދޭޝްއަށް ނިސްބަތްވާ 150،000 މަސައްކަތްތެރިން އެބައުޅޭ ކަމަށެވެ. އަދި އޭގެ ތެރޭގައި 50000 މީހުންނަކީ ނުގަވައިދުން އުޅޭ މީހުންކަމަށް މިނިސްޓަރު ވިދާޅުވިއެވެ.
ސަރުކާރުން ވަނީ ގަވައިދާ ހިލާފަށް ރާއްޖޭގައި އުޅޭ ބަންގްލަދޭޝް މީހުން ގާނޫނީ އިމުގެ ތެރެއަށް ވެއްދުމަށް ހާއްސަ ޕްރޮގްރާމްތަކެއް ފަށާފައެވެ. އެގޮތުން ގަވައިދާ ހިލާފަށް އުޅޭ ބަންގްލަދޭޝް މީހުން ގާނޫނީ އިމުގެ ތެރެއަށް ވެއްދުމުން ބަންގްލަދޭޝްއަށް ކަނޑައަޅާފައިވާ ކޯޓާ ހަމަވާނެކަމާށް އަންދާޒާ ކުރެއްވޭކަމަށް މިނިސްޓަރު ފައްޔާޒު ވިދާޅުވިއެވެ.
އެގޮތުން އެއް އަހަރު ދުވަސް ވަންދެން އިތުރަށް އަންސްކިލްޑް ދާއިރާތަކަށްއަށް ބަންގްލަދޭޝްއިން މީހުން އިތުރަށް ނުގެނެވޭނެ ގޮތަށް މަނާކުރުމުން، އެކަމުގެ ސަބަބުން ރާއްޖޭގެ އިގްތިސޯދަށް އެއްވެސް ގޮންޖެހުމެއް ހުރި ކަމަށް ބެލެވިއްޖެ ހާލަތެއްގައި، ހަ މަސް ފަހުން އެ ނިންމުން އަލުން ރިވިއު ކުރާނެ ކަމަށް ފައްޔާޒު ވިދާޅުވިއެވެ.
އަދި ބަންގުލަދޭޝް މީހުން ގެނައުން މަނާކޮށްފައިވީ ނަމަވެސް، މިއަދާއި ހަމައަށް ވޯކް ޕާމިޓަށް އެޕްލައި ކޮށްފައި ތިބި ފަރާތްތައް އޭގެ ތެރޭގައި ނުހިމެނޭނެކަމަށް ފައްޔާޒު ވިދާޅުވިއެވެ.
