ގަދަކަމުން ގެންގޮސް މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިޟްވާން މަރާލި މައްސަލާގައި، މަރުތައް ތަހުގީގު ކުރާ ރިޔާސީ ކޮމިޝަން ހާޒިރުކުރި ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) ގެ ބައްދަލުވުން ސިއްރުކޮށްފިއެވެ.
މިއަދު ހެނދުނު 10:00 ޖަހާއިރަށް ބޭއްވުމަށް ފުރަތަމަ ތާވަލް ކުރުމަށްފަހު މިއަދު މެންދުރު 2:00 އަށް ބަދަލުކުރި ކޮމިޓީ ސިއްރު ކޮށްފައިވަނީ ކޮމިޓީގެ މެންބަރުން އެގޮތަށް އިއްތިފާގުވެގެންނެވެ.
241 ކޮމިޓީއަށް މަރު ކޮމިޝަންގެ މެންބަރުން ހާޒިރު ކުރީ ރިޟްވާން ރަހީނުކޮށް މަރާލި މައްސަލައާ ގުޅިގެން އެ ކޮމިޝަނުން އެކުލަވާލާފައިވާ ރިޕޯޓާ ގުޅޭ ގޮތުން މަޝްވަރާ ކުރުމަށެވެ. މަޖިލީހުގެ އިދާރާއިން ބުނީ ކޮމިޓީގެ މެންބަރުން ބޭނުންވެގެން ކޮމިޓީ ސިއްރު ކޮށްފައިވާ ކަމަށެވެ.
މަޖިލިސް ޗުއްޓީއަށް ދިޔަނަމަވެސް، މަޖިލީހުގެ 241 ކޮމިޓީގެ މަސައްކަތް ކުރިއަށް ގެންދިއުމަށް ވަނީ ނިންމާފައެވެ. މިއަދު މަރު ކޮމިޝަން ހާޒިރުކޮށް ކޮމިޓީ ސިއްރުކޮށްފައިވާ އިރު، މިދިޔަ ބުރާސްފަތި ދުވަހު ފުލުހުންގެ މުއައްސަސާގެ އިސް ބޭފުޅުން ހާޒިރު ކުރި ކޮމިޓީ ބައްދަލުވުން ވެސް ވަނީ ސިއްރު ކޮށްފައެވެ.
