ސަލްމާން ހާންގެ "ދަބަންގް 3" 2020 ވަނަ އަހަރަށް ލަސްވި ކަމަށް ދެކެވޭ ވާހަކަތައް، ފިލްމުގެ ލީޑު އެކްޓްރެސް ސޮނާކްޝީ ސިންހާ ދޮގުކޮށްފިއެވެ.
މިއަހަރު ރިލީޒްކުރި ގިނަ ފިލްމުތަކަކުން ފެނިގެން ގޮސްފައިވާ ސޮނާކްޝީ ސިންހާ، ބޮމްބޭ ޓައިމްސްއަށް ދިން އިންޓަވިއުއެއްގައި ބުނީ، ކުރިންވެސް ހަމަޖެހިފައި އޮތް ގޮތަށް، މިއަހަރުގެ ޑިސެމްބަރުމަހުގެ ފަހުކޮޅު "ދަބަންގް 3" ރިލީޒްކުރެވޭނެ ކަމަށެވެ.
ފިލްމުގެ ޝޫޓިންގްގެ މަސައްކަތްތައް މިހާރު މުޅިން ނިމިފައިވާކަމަށާ، މިހާތަނަށް ކުރެވުނު ހުރިހާ މަސައްކަތަކާ މެދު އިންތިހާއަށް ހިތްހަމަޖެހޭކަންވެސް ސޮނާކްޝީ ވަނީ ފާހަގަކޮށްފައެވެ. ސަލްމާންއާއިއެކު އަނެއްކާވެސް މަސައްކަތްކުރަން ލިބުމާ ގުޅޭ ގޮތުން ވާހަކަދައްކަމުން ސޮނާކްޝީ ބުނީ، "ދަބަންގް" ފްރެންޗައިޒްގެ ފިލްމެއްގައި މަސައްކަތްކުރަން ލިބުމުން ކުރެވުނީ އެތައް ޒަމާނަކަށްފަހު އަމިއްލަ ވަޒަނަށްދެވުމުން ކުރެވޭ ފަދަ އިހުސާސްތަކެއް ކަމަށެވެ.
ފިލްމު ރިލީޒްކުރުމަށް އަދި 3 މަހެއްހާ ދުވަސް އޮތްއިރު، އޭނާ އިނީ އިންތިހާއަށް "އެކްސައިޓް"ވެފައިކަންވެސް ސޮނާކްޝީ ވަނީ ފާހަގަކޮށްފައެވެ.
