ރައްޔިތުންގެ މަޖިލީހުގައި ކުރިއަށްދާ ދެކުނު އޭޝިއާގެ ގައުމުތަކުގެ ގާނޫނު ހަދާ މަޖިލީސްތަކުގެ ރައީސުންގެ ސަމިޓުގައި، ޕާކިސްތާނާއި އިންޑިއާއިން ކަޝްމީރު މައްސަލައިގައި ބަހުގެ ހޫނު ހަމަލާތަކެއް ބަދަލު ކޮށްފިއެވެ.
މި ބަހުގެ ހަމަލާތައް ރައްދު ކުރުމަށް ފެއްޓެވީ، ޕާކިސްތާނުގެ މަޖިލީހުގެ ނައިބު ރައީސް މުހައްމަދު ގާސިމް ޚާން ސޫރީ ތަގުރީރު ދެއްވަމުން ދަނިކޮށް، އިންޑިއާގެ ފަރާތުން ނިޒާމީ ނުކުތާއެއް ނަގައި ކަޝްމީރާ ގުޅުވައި ޕާކިސްތާނުގެ މަޖިލީހުގެ ނައިބު ރައީސް ދެއްކި ވާހަކައަށް ރައްދު ދޭން ފެށި ހިސާބުންނެވެ.
އެގޮތުން ކަޝްމީރުގެ މުސްލިމް ރައްޔިތުން ކުރިމަތިލާން ޖެހިފައިވާ އަނިޔާގެ ވާހަކައާ ބެހޭ ގޮތުން ޕާކިސްތާނުގެ ފަރާތުން ވާހަކަ ދައްކަވަމުން ގެންދަނިކޮށް އިންޑިއާއިން ވަނީ ޓެރަރިޒަމްގެ ކަންކަމަށް ފުރުސަތު ނުދެވޭނެ ކަމަށާއި، ބުނެ ނިޒާމީ ނުކުތާއެއް ނަގާފައެވެ. ފުރަތަމަ އިންޑިއާގެ ފަރާތުން ނިޒާމީ ނުކުތާއެއް ނެގުމުން ވެސް ޕާކިސްތާނުގެ މަޖިލީހުގެ ނައިބު ރައީސް ވާހަކަ ދެއްކެވުން ހުއްޓާ ނުލައްވާ ވާހަކަދެކެވުން ކުރިއަށް ގެންދެވިއެވެ. އޭނާގެ ވާހަކަ ދެއްކުން މެދު ކަނޑާލީ، ރިޔާސަތުން ވާހަކަ މެދު ކަނޑާލުމަށް ތަކުރާރުކޮށް އެންގުމުންނެވެ.
އިންޑިއާގެ ފަރާތުން ނިޒާމީ ނުކުތާއެއް ނަގާ ދެއްކި ވާހަކައާ ގުޅިގެން ޕާކިސްތާނުން ވެސް ނިޒާމީ ނުކުތާއެއް ނަގާ، އެ ގައުމުގެ ފަރާތުން މަޖިލީހުގެ ނައިބު ރައީސް ދައްކަވަމުން ގެންދެވީ އެ ގައުމުގެ މަސްލަހަތާ ގުޅުން ހުރި ކަންކަން ކަމަށް ބުނެ ރައްދު ދީފައިވެއެވެ.
ދެ ފަރާތުން ވެސް ނިޒާމީ ނުކުތާއެއް ނަގާފައި ވާއިރު، ރިޔާސަތުން ވަނީ ދެ ގައުމުން ވެސް ފާހަގަކުރީ ނިޒާމީ ނުކުތާއެއް ނޫން ކަމަށް ބަލައި ޕާކިސްތާނުގެ ނައިބު ރައީސްގެ ތަގުރީރު ކުރިއަށް ގެންދަވަން އެދިވަޑައިގެންފައެވެ. ނަމަވެސް، ދެ ގައުމުގެ ފަރާތުން ވެސް ނިޒާމީ ނުކުތާ ނަގާ އެއް ގައުމު އަނެއް ގައުމަށް ބަހުގެ ހަމަލާތައް ބަދަލު ކޮށްފައިވާއިރު، ރިޔާސަތުން ވަނީ ތަކުރާރުކޮށް އެކަން ހުއްޓާލުމަށް އެދި ވަޑައިގެންފައެވެ.
މެންދުރުގެ ކެއުމަށް އެ ސެޝަން މެދުކަނޑާލިކަމަށް ރިޔާސަތުން އިއުލާން ކުރީ ވެސް ދެ ގައުމުގެ މަޖިލީހުގެ އިސްވެރިންތައް ބަހުގެ ހަމަލާތައް ބަދަލު ކުރަމުންދަނިކޮށެވެ.
