1972 ވަނަ އަހަރު ފިލްމް "ޝޯރު"އަށް ލަތާ މަންގޭޝްކަރު ކިޔާދީފައިވާ ހިތްގައިމު ލަވަ "އެކް ޕިޔާރު ކަ ނަގުމާ ހޭ"، ރޭލު ސްޓޭޝަނެއްގައި އިނދެގެން ކިޔާލަދިން ރާނޫ މަންދާލްއަށް ހުވަފެނެއްގައިވެސް ފެނިފައި ނުވާ ވަރުގެ ބޮޑު އުފަލެއް ލިބިއްޖެއެވެ.
ރާނޫ މަންދާލްގެ ""އެކް ޕިޔާރު ކަ ނަގުމާ ހޭ" ވާޝަން އިންޓަނެޓްގައި ވައިރަލްވެ، އެތައް ބައެއްގެ ސަމާލުކަން، ދުނިޔޭގެ އެކިކަންކޮޅުތަކުން އޭނާއަށް ހުއްޓިފައިވަނިކޮށް، ބޮލީވުޑްގެ އެކްޓާ އަދި މިއުޒިކް ކޮމްޕޯޒާ ހިމޭޝް ރޭޝަމިޔާ މިވަނީ ރާނޫ ލައްވާ ހިންދީ ފިލްމެއްގެ ލަވަ ރެކޯޑްކުރުވާފައެވެ.
ރާނޫ މަންދާލް މިހާރު ވަނީ ފިލްމް "ހެޕީ ހާޑީ އެންޑް ހީރް"އަށް، އޭނާގެ ހިތްގައިމު އަޑުން ލަވައެއް ރެކޯޑްކޮށްދީފައެވެ. މި ފިލްމުގެ ލީޑު ރޯލުން ފެނިގެންދަނީ ހިމޭޝްއެވެ. މި ފިލްމަށް ރާނޫ ކިޔާދިނީ "ތޭރީ މޭރީ ކަހާނީ" ނަމަކަށް ކިޔާ ލަވައެއް ކަމަށާ، އެއީ ހިމޭޝްގެ އަމިއްލަ ލަވައެއް ކަމަށް އޭނާ ވަނީ ބުނެފައެވެ.
ރާނޫއާއި ހިމޭޝް މި ލަވަ ރެކޯޑްކުރުގެ މަސައްކަތުގައި ހަރަކާތްތެރިވާތަން ފެންނަ މަންޒަރުތަކެއް ސޯޝަލް މީޑިއާގައި އާންމުކޮށްފައިވާއިރު، އެތައް ހާސް ބަޔަކު ދަނީ މި މަސައްކަތަށް ތައުރީފުކުރަމުންނެވެ.
ހިމޭޝް ބުނާ ގޮތުގައި، މަސައްކަތްކޮށްފިނަމަ ކޮންމެ ހުވަފެނަކީވެސް ހަގީގަތަކަށް ހެދިދާނެ ހުވަފެންތަކެކެވެ. އެކަމަށް ބޭނުންވަނީ އުއްމީދެކެވެ. އަދި ރަނގަޅަށް ކަންކަން ވެދާނެކަން ގަބޫލުކުރުމެވެ.
