މިއަދު ފާހަގަކުރަމުން ދާ އިންޑިއާގެ 73 ވަނަ މިނިވަން ދުވަހުގެ ތަހުނިޔާ ރައީސް އިބްރާހިމް މުހައްމަދު ސޯލިހު ފޮނުއްވައިފިއެވެ.
މިނިވަން ދުވަހުގެ ތަހުނިޔާ އިންޑިއާގެ ބޮޑުވަޒީރު ނަރެންދްރަ މޯދީ އާއި އެގައުމުގެ ރައްޔިތުންނަށް ދަންނަވާ ކަމަށް ވިދާޅުވުވަމުން ރައީސް ސޯލިހު މިއަދު ކުރެއްވި ޓްވީޓެއްގައި ވިދާޅުވީ، އިންޑިއާ އަކީ ރާއްޖެއާ އަވަށްޓެރި އަދި ގާތް ގުޅުމެއް ބާއްވަމުން ދާ ގައުމެއް ކަމަށާ ދެ ގައުމުގެ ގުޅުން އިތުރަށް ބަދަހި ކުރުމަށް އިންޑިއާ ސަރުކާރާ އެކު މަސައްކަތް ކުރައްވާނެ ކަމަށެވެ.
ރައީސް ސޯލިހު ވެރިކަމަށް ވަޑައިގެންނެވުމަށްފަހު އިންޑިއާ އާ ރާއްޖޭގެ ގުޅުން ބަދަހިކުރުމަށް ވަނީ ވަރަށް ބޮޑެތި މަސައްކަތްތައް ކުރެވިފައެވެ. އެގޮތުން ރައީސް ސޯލިހު ވެރިކަމާ ހަވާލުވެ ވަޑައިގެން ހުވާ ކުރެއްވުމުގެ ރަސްމިއްޔާތަށް ބޮޑު ވަޒީރު މޯދީ ވަޑައިގެންނެވި އިރު، ގައުމުން ބޭރަށް ރައީސް ސޯލިހު ކުރެއްވި ފުރަތަމަ ދަތުރުފުޅުގައި ވަޑައިގެންނެވީ ވެސް އިންޑިއާ އަށެވެ.
މީގެއިތުރުން ބޮޑުވަޒީރު ކަމުގެ ދެވަނަ ދައުރަކަށް އިންތިހާބުވެ ވަޑައިގެންނެވުމަށްފަހު ގައުމުން ބޭރަށް ކުރެއްވި ރަސްމީ ފުރަތަމަ ދަތުރުފުޅުގައި ބޮޑުވަޒީރު މޯދީ ވަޑައިގެންނެވީ ރާއްޖެ އަށެވެ. އެ ދަތުރުފުޅުގައި، ރާއްޖެއަށް ވަޑައިގަންނަވާ ބޭރުގެ އިއްޒަތްތެރިންނަށް އަރުވާ އެންމެ މަތީ ލަގަބު ކަމަށްވާ ނިޝާން އިއްޒުއްދީނުގެ ލަގަބު ވަނީ މޯދީ އަށް އަރުވާފައެވެ. މި ލަގަބު ބޮޑުވަޒީރު މޯދީއަށް އަރުވާފައިވަނީ ރައީސް އޮފީހުގައި މިކަމަށް ހާއްސަކޮށް ބޭއްވި ރަސްމިއްޔާތެއްގައި ރައީސް އިބްރާހިމް މުހައްމަދު ސޯލިހެވެ.
