ދުނިޔޭގެ ތައްޓަށް ކުޅޭ ކުރިކެޓް ވާލްޑްކަޕްގެ ތަށި އިންޑިއާއައިން އުފުލާލި ތާރީހީ ވަގުތުކޮޅާ ގުޅިފައިވާ، މީގެ ކުރިން ފެނިފައި ނުވާ ބައެއް މަންޒަރުތައް، ކަޕީލް ދޭވްގެ ބައޯޕިކް "83" އިން ފެނިގެންދާނެ ކަމަށް ޚަބަރު ލިބިއްޖެއެވެ.
މީގެ ކުރިން ލޯބީގެ ފަހުލަވާނެއްގެ ގޮތުގައި ފެނިގެންދިޔަ ރަންވީރު ސިންހް، ކަޕީލް ދޭވްގެ ރޯލުން ފެނިގެންދާ މި ފިލްމުގައި ދީޕިކާ ޕަދުކޯންވެސް ހަރަކާތްތެރިވެއެވެ.
ކަބީރު ހާން ޑައިރެކްޓްކުރާ ފިލްމް "83"ގެ ޕޯސްޓަރުތައް އާންމުކުރުމާއެކު އާންމުންގެ މާ ބޮޑު ތަރުހީބެއް ލިބިގެން ނުދިޔަ ކަމުގައި ވީނަމަވެސް، ސެޓުން ރަންވީރު ހިސާކުރަމުންދިޔަ ވީޑިއޯކޮޅުތަކާއެކު ގިނަ ބަޔަކު ވަނީ މި ފިލްމު ބަލަން ޝައުގުވެރިވާކަން ފާޅުކޮށްފައެވެ.
ވާލްޑްކަޕަށް އިންޑިއާ ކުރި ދަތުރުގެ އިތުރުން ކަޕީލް ދޭވްގެ ދިރިއުޅުމާ ބެހޭ ގިނަ ވާހަކަތަކެއް ހިމަނައިގެން އުފައްދާ ފިލްމް "83" ސިނަމާތަކާ ހިސާބަށް އަންނާނީ 2020 ވަނަ އަހަރުގެ އޭޕްރިލް މަހުގެ ތެރޭގައެވެ.
