މަޝްހޫރު ޓީވީ ޝޯ "ހޫ ވޯންޓްސް ޓު ބީ އަ މިލިއަނާ" އަސްލަކަށް ބަލައިގެން އިންޑިއާގައި އުފައްދާ، ދުރަށް ދައްކަމުން އަންނަ "ކޯން ބަނޭގާ ކްރޯރްޕަތީ" (ކޭބީސީ)ގެ 11 ވަނަ ސީޒަންގެ ޝޫޓިން ފަށައިފިއެވެ.
ބޮލީވުޑް މެގާ ސްޓާޓް އަމީތާބު ބައްޗަން ވަނީ، މި ޝޯގެ ހޮސްޓުގެ ގޮތުގައި އޭނާ ފެނިގެންދާނެ ގޮތުގެ ޓީޒާއެއް، އޭނާގެ ފޭނުންނާ ހިއްސާކޮށްފައެވެ.
އަމީތާބު ވަނީ ކޭބީސީގެ ސެޓުންގެ ގިނަ މަންޒަރުތަކެއް ބެލުންތެރިންނާ ހިއްސާކޮށް، ގިނަ ބައެއްގެ ސަމާލުކަން ސީޒަން 11 އަށްވެސް ހުއްޓުވާފައެވެ.
އެންމެ ސީޒަނެއް ފިޔަވާ ކޭބީސީގެ ހުރިހާ ސީޒަނެއްވެސް ހޮސްޓްކޮށްފައިވަނީ އަމީތާބެވެ. ކޭބީސީގެ 3 ވަނަ ސީޒަންގެ ހޮސްޓެއްގެ ގޮތުގައި ބޮލީވުޑްގެ ރަސްގެފާނު ޝާހް ރުކް ހާން ފެނިގެންދިޔަ ނަމަވެސް، އެދެވޭ ތަރުހީބެއް ލިބި، އެކަން ވައިގައި ހިފާ ގޮތް އޮތީ ނުވެފައެވެ.
"ކޯން ބަނޭގާ ކްރޯރްޕަތީ" (ކޭބީސީ)ގެ 11 ވަނަ ސީޒަން ދައްކަން ފަށަނީ މި އޯގަސްޓް މަހުގެ 19 ވަނަ ދުވަހުއެވެ. ސޮނީ ޓީވީން މި ޝޯ ގެނެސްދޭ އާންމުކޮށްވެސް މި ޝޯ ގެނެސްދެމުންދިޔަ ފަދައިން އިންޑިއާ ގަޑިން ރޭގަނޑު 09:00 ގައެވެ.
