ސަލްމާން ހާންއާއި މަދޫރީ ދިކްޝީތުގެ އަދަޔާ ހިލާފު ކެމިސްޓްރީއެއް ފެނިގެންދާ ފިލްމް "ހަމް އާޕްކޭ ހޭ ކޯން"އަށް ރިލީޒް ކުރިތާ 25 އަހަރު ފުރުމާ ދިމާކޮށް، އެ ފިލްމުގެ ހާއްސަ ޝޯއެއް ބޭއްވުމަށް ޕްރޮޑިއުސަރުން ތައްޔާރުވަމުން އެބަދެއެވެ.
"ހަމް އާޕްކޭ ހޭ ކޯން" ރިލީޒް ކޮށްފައިވަނީ 1994 ވަނަ އަހަރުގެ އޯގަސްޓް މަހުގެ 5 ވަނަ ދުވަހުއެވެ.
ސޫރަޖު ބާރުޖަތްޔާ ޑައިރެކްޓްކޮށް، ރާޖްޝްރީ ޕްރޮޑަކްޝަންސްއިން އުފައްދާފައިވާ "ހަމް އާޕްކޭ ހޭ ކޯން"އަކީ ބޮލީވުޑްގެ ފިލްމީ ސިނާއަތުން ރިލީޒް ކުރި ފިލްމުތަކުގެ ތެރެއިން ދުނިޔޭގެ އެކި ހިސާބުތަކުން ބޮޑު މަގުބޫލުކަމެއް ހޯދި ފިލްމެކެވެ.
"ހަމް އާޕްކޭ ހޭ ކޯން" ރިލީޒް ކުރިތާ 25 އަހަރު ފުރުމާ ދިމާކޮށް ބާއްވާ ހާއްސަ ޝޯ އޮންނާނީ މިމަހުގެ 9 ވަނަ ދުވަހުއެވެ.
ފިލްމް "ހަމް އާޕްކޭ ހޭ ކޯން" އަކީ، ރާޖްޝްރީ ޕްރޮޑަކްޝަންސްއިން 1982 ވަނަ އަހަރު އުފެއްދި ފިލްމް "ނާދިޔާ ކި ޕާރް"ގެ 'ޒަމާނީ' ރީމޭކްއެކެވެ.
