ކުރީގެ ރައީސް އަބްދުﷲ ޔާމީންގެ ވެރިކަމުގައި ބޮޑެތި ބަދަލުތަކެއް ގެނެސް ނަން ބަދަލުކުުރުމަށްފަހު ހުޅުވި ރަސްރަނި ބަގީޗާގެ ނަން އަލުން ސަލްޓަން ޕާކަަށް ބަދަލުކޮށްފިއެވެ.
ރަސްރަނީގެ ނަން ސަލްޓަން ޕާކަށް ބަދަލުކުރިކަމެއް އަދި މިހާތަނަށް ސިޓީކައުންސިލުން ރަސްމީކޮށް އިއުލާން ނުކުރި ނަމަވެސް، އެތަނުގެ ބޭރުގައި އިސްލާމީ މަރުކަޒާ ދިމާލުން އިންނަ ނަން ބޯޑު ވަނީ ބަދަލުކޮށްފައެވެ.
ސިޓީ ކައުންސިލުން މީގެ ކުރިން ބުނެފައިވަނީ ރަސްރަނީގެ ނަން ސަލްޓަން ޕާކުގެ ނަމަށް އަލުން ބަދަލުކުރަން ނިންމީ އެ ޕާކަކީ ރާއްޖޭގެ ތާރީހީ މުހިންމު ތަނަކަށް ވެފައި، ހެރިޓޭޖް މިނިސްޓްރީގެ ލަފަޔާއެކު ކަމަށެވެ.
ރަސްރަނީގެ ނަން އަލުން ސަލްޓަން ޕާކަށް ބަދަލުކުރަން ނިންމީ ސިޓީކައުންސިލުން ބޭއްވި ބައްދަލުވުމަކަށްފަހު، ހުރިހާ މެންބަރުން އިއްތިފާގު ވެގެންނެވެ.
ސަލްޓަން ޕާކު ތަރައްގީކުރި އިރު މިދިޔަ ސަަރުކާރުން ވަނީ އެތަނުގައި ހުރި ބައެއް ތަންތަނަށް ބަދަލު ގެނެސް، އެ ބްލޮކްގައި ހުރި އާސާރީ ކަޅުވަކަރު މިސްކިތް ވެސް ނަގާފައެވެ. އަދި އެތަނުގައި ފިނި ތަންތާގައި ކުޅޭ ކުޅިވަރުތައް ހިމަނައިގެން ސްނޯ ޕާކުގެ ނަމުގައި ވަކި ތަނެއް ހުޅުވާފައެވެ.
