ހޮލީވުޑް ފްރެންޗައިޒްތަކާ ގުޅޭ އިންޑިއާގެ ތަރިންގެ ލިސްޓަށް، އިންޑިއާގެ މަޝްހުރު ކޮމީޑިއަން ކަޕީލް ޝަރުމާގެ ނަންވެސް އިތުރުވެއްޖެއެވެ.
ޑިޒްނީގެ އެނިމޭޓަޑް ފިލްމް "ދަ ލަޔަން ކިންގް"ގެ ހިންދީ ވާޝަންއަށް އަޑުއަޅާދީގެން ބޮލީވުޑްގެ ރަސްގެފާނު ޝާހް ރުކް ހާން، ގިނަ ބައެއްގެ ސަމާލުކަން ހޯދިތާ މާ ގިނަ ދުވަހެއް ނުވެ އުޅެނިކޮށް، "ދި އެންގްރީ ބާޑްސް މޫވީ 2"އަށް ކަޕީލް ޝަރުމާގެ އަޑު ބޭނުންކުރާނެކަން މިވަނީ ހާމަކޮށްފައެވެ.
"ދި އެންގްރީ ބާޑްސް މޫވީ 2" ގެ ހިންދީ ވާޝަންގައި ކަޕީލް ޝަރުމާ އަޑު އަޅާނީ ގިނަ ބައެއްގެ މެދުގައި އެންމެ މަގުބޫލު ކެރެކްޓާ "ރެޑް"އަށް ކަމަށް ޚަބަރު ލިބެއެވެ.
2 މިނެޓް 44 ސިކުންތަށް ދެމިގެންދާ ދިގު ޓްރޭލާއެއް އާންމުކޮށްފައިވާއިރު، "ދި އެންގްރީ ބާޑްސް މޫވީ 2" އިންވެސް ހެއްވާ، މަޖާ ގިނަ ކަންތައްތަކެއް ފެނިގެންދާޏެ ކަމަށް ބެލެވެއެވެ.
އިނގިރޭސި އާއި ހިންދީގެ އިތުރުން ތަމަޅާއާއި ތެލޫގޫ ބަހުންވެސް "ދި އެންގްރީ ބާޑްސް މޫވީ 2" ރިލީޒް ކުރުމަށް ވަނީ ހަމަޖެހިފައެވެ.
ކަޕީލް ޝަރުމާ މިހާރުވެސް ދަނީ ސޮނީ ޓީވީއިން ގެނެސްދޭ "ދަ ކަޕީލް ޝަރުމާ ޝޯ"ގައި މަސައްކަތް ކުރަމުންނެވެ.
"ދި އެންގްރީ ބާޑްސް މޫވީ 2" ރިލީޒް ކުރުމަށް ހަމަޖެހިފައިވަނީ އަންނަ އޯގަސްޓް މަހުގެ 23 ވަނަ ދުވަހުއެވެ.
