ނޮވެމްބަރު 3 ގައި ރާއްޖެއަށް ދިން އުދުވާނީ ހަމަލާތަކުގެ މޭސްތިރި، ހ.ހާޖަރާގޭ އަބްދުﷲ ލުތުފީ ވީ އެންމެ އަވަހަކަށް ރާއްޖެ ގެނައުމަށް ގޮވާލައި ޕީއެންސީ އަދި ޕީޕީއެމް ހިމެނޭ އިދިކޮޅު އިއްތިހާދުން އިހުތިޖާޖު ކުރުމަށް ނިންމައިފިއެވެ.
މިކަން އިއުލާނުކޮށްފައި ވަނީ އިދިކޮޅު އިއްތިހާދު މިއަދު ބޭއްވި ނޫސްވެރިންގެ ބައްދަލު ވުމެއްގައެވެ. މިކަމާ ގުޅޭގޮތުން ނޫސްވެރިްނާ ވާހަކަ ދައްކަމުން އިދިކޮޅުން ބުނީ ޖުމްލަ ފަސް މީހުން އިހުތިޖާޖު ކުރުމަށް ނިކުތް ކަމުގައި ވިޔަސް އެ ފަރާތްތަކުން އިހުތިޖާޖު ކުރާނެ ކަމަށާ ލުތުފީއަކީ ބޮޑު ކުށްވެރިއެއް ކަމަށާ، އޭނާ ވީ އެންމެ އަވަހަކަށް ރާއްޖެ ގެނައުމަކީ ކުރުން މަޖުބޫރު ކަމެއް ކަމަށެވެ.
ލުތުފީ ލަންކާގެ އެމްބަސީ އަށް އަމިއްލައަށް ހާޒިރުވީ މިއަހަރުގެ މޭ މަހުގެ 1 ވަނަ ދުވަހު ކަމަށް މިހާރުގެ ސަރުކާރުން ބުނަމުން ދިޔަ ނަމަވެސް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ޕްރެސް ކޮންފަރެންސެއްގައި، ލުތުފީ އެމްބަސީއަށް ދިޔައީ ލަންކާ އަށް ދިން ހަމަލާގެ ކުރީ ދުވަހު، އޭޕްރީލް މަހުގެ 20 ވަނަ ދުވަހު ކަމަށް ވިދާޅުވެފައި ވުމުން އެ ފަރާތްތަކުން ވަނީ ސުވާލު އުފައްދާފައެވެ.
އަދި ލުތުފީ ލަންކާގެ އެމްބަސީގައި ހުރެ މިހާރު ރާއްޖެ ނުގެނެވިގެން އުޅޭ އުޅުމަކީވެސް ގަބޫލު ކުރަން ދަތި ކަމެއް ކަމަށް އިދިކޮޅު އިއްތިހާދުން ވަނީ ބުނެފައެވެ. އަދި އެފަރާތްތަކުން ބެލި ބެލުމުން ލިޔެކިޔުންތައް ހަމަކޮށްގެން ލުތުފީ ރާއްޖެ ގެނައުމަކީ އެންމެ ދެދުވަހުގެ ތެރޭގައިވެސް ކުރެވިދާނެ ކަމެއް ކަމަށްވެސް އެނގިފައި ވާކަމަށްވެސް އިދިކޮޅުން ބުނެއެވެ.
އަދި ލުތުފީ ފަދަ ބޮޑު ކުށްވެރިއަކު ލަންކާ އެމްބަސީއަށް ހާޒިރުވުމުން އޭނާ ހުރިކަން ދިވެހި ރައްޔިތުންނަށް އެންގުމެއް ނެތި، އޭނާ ވީއައިޕީ ފެންވަރުގެ ކޮޓަރިތަކުގައި ބެހެއްޓުމަކީވެސް ސުވާލު އުފެދޭ ކަމެއް ކަމަށް އެ ފަރާތްތަކުން ވަނީ ބުނެފައެވެ.
މީގެ އިތުރުން ކުރީގެ ރައީސް އަބްދުﷲ ޔާމީނުގެ ދައުރުގައި ރައްޔިތުންނަށް ދޭން ނިންމި ފްލެޓުތައް މި ސަރުކާރުން ދިނުން ލަސްވުމާ ގުޅިގެންވެސް މި އިހުތިޖާޖުގެ ތެރެއިން އަޑު އުފުލުމަށް އެ ފަރާތްތަކުން ވަނީ ނިންމާފައެވެ. އަދި އޭރު އިމާރާތް ކުރުމަށް ނިންމާފައިވާ 7000 ހައުސިން ޔުނިޓުގެ އަދަދު މަދުވަމުން ދާތީ އެކަން ވެސް ސާފުކޮށްދިނުމަށް މި އިތިޖާޖުގެ ތެރެއިން އަޑު އުފުލުމަށް ވަނީ ނިންމާފައެވެ.
އިދިކޮޅުން ވަނީ އެ ޕާޓީތަކުގެ ބޮޑު އެއްވުމެއް ކާނިވާ ސަރަކައްދުގައި ބޭއްވުމަށް ހުއްދަ ނުދީފި ނަމަ ބަލަން ނުތިބޭނެ ކަން މީގެ ކުރިން އިއުލާނުކޮށްފައެވެ.
