މީގެ 5 ވަރަކަށް އަހަރު ކުރިން ފިލްމް "ޑަންގަލް" އިން ގިނަ ބައެއްގެ ސަމާލުކަން ހޯދި ޒުވާން ބަތޮލާ ޒާއިރާ ވަސީމު، ބޮލީވުޑް ސިނާއަތާ ދުރަށް ދިއުމަށް ނިންމާފައިވާކަން ހާމަކޮށްފިއެވެ.
ކަޝްމީރަށް އުފަން ޒާއިރާ، ފިލްމީ ސިނާއަތާ ދުރަށް ދާން ނިންމިކަން ހާމަކޮށްފައިވަނީ މިއަދު ހެނދުނުގެ ވަގުތެއްގައި އޭނާ އާންމުކުރި އިންސްޓަގްރާމް ޕޯސްޓެއްގައެވެ.
މި ޕޯސްޓްގައި ޒާއިރާ ބުނެފައިވަނީ، އޭނާ ބޮލީވުޑަށް "ފިޓް"ވިކަމުގައި ވީނަމަވެސް މި ސިނާއަތަކީ އޭނާއަށް އޮތް ސިނާއަތެއް ނޫންކަމަށެވެ. މިދާއިރާގައި ކުރިމަތިލާންޖެހުނު ގޮންޖެހުންތަކާ، އުފުއްލަންޖެހުނު އެކިކަހަލަ ތަކުލީފުތަކުގެ މައްޗަށްވެސް ޒާއިރާ ވަނީ މި ޕޯސްޓްގައި އަލިއަޅުވާލާފައެވެ.
ފިލްމީ ދާއިރާގެ މަސައްކަތުގެ ތެރެއިން ޣާފިލުކަމުގެ ތެރެއަށް ވެއްޓި، ދީނާ އޭނާއާއި މެދު އޮތް ގުޅުމަށް ނުރައްކާވެއޭ އިހުސާސްކުރެވޭ ދަރަޖައަށް ކަންކަން ދިޔަކަންވެސް ޒާއިރާގެ ޕޯސްޓްގައިވަނީ ފާހަގަކޮށްފައެވެ.
ޒާއިރާގެ އާއިލާގެ އިތުރުން ގިނަ އަދަދެއްގެ ފޭނުންވެސްވަނީ ޒުވާން ބަތޮލާގެ މި ނިންމުމަށް ތާއީދުކުރާކަން ހާމަކޮށްފައެވެ.
ޒާއިރާގެ މަސައްކަތެއް ދެން އެންމެ އަވަހަށް ފެނިގެންދާނީ ޝޮނާލީ ބޮސްގެ "ދަ ސްކައި އިޒް ޕިންކް"އިންނެވެ.
