މިދުވަސްކޮޅަކީ ބޮލީވުޑްގެ ބަތޮލް ސަލްމާން ހާންއާއި ގުޅޭ ގޮތުން ގިނަ މައްސަލަތަކެއް މީޑިއާއަށް ތިލަވަމުން އަންނަ ދުވަސްކޮޅެކެވެ. އެގޮތުން އަނެއްކާވެސް މިވަނީ އެފަދަ އިތުރު މައްސަލައެއް، ސޯޝަލް މީޑިއާގެ ސަބަބުން ގުގުމާލާފައެވެ.
މިފަހަރު މައްސަލައަކަށްވެގެން މުއުޅެނީ ސަލްމާން ހާން ބައިސްކަލު ދުއްވި ގޮތެވެ. އިންޑިއާގެ ވިޔަފާރީ މަރުކަޒީ ރަށް އަދި ބޮލީވުޑްގެ ފިލްމް ސިޓީގެ ގޮތުގައި ސިފަކުރަމުން އަންނަ މުމްބާއީގެ މަގުތައްމަތީގައި ސަލްމާން ހާން ބައިސްކަލުގައި ދާ މަންޒަރު އޭނާގެ ސޯޝަލް ޓްވިޓާގައި އާންމުކޮށްފައިވާއިރު، ފޭނުންނަށް މި ވީޑީއޯ ވަރަށް ކަމުދިޔައެވެ. ނަމަވެސް އިސާހިތަކު ރާގު ބަދަލުވީ ބަޔަކަށް އެއްޗެއް ފާހަގަވީ ހިސާބުންނެވެ.
ގެލެކްސީ އެޕާޓްމަންޓްއިން ފެށިގެން މެހެބޫބު ސްޓޫޑިއޯއަށް ކުރި އެންމެ 5 މިނެޓްގެ ބައިސްކަލު ދަތުރުގައިވެސް ސަލްމާންގެ ފަރާތުން ނޭދެވޭ ކަންތައްތަކެއް ފާހަގަވީ ބަޔަކު އެބައުޅެއެވެ. އެމީހުންނަށް މައްސަލައަކަށްވީ ސަލްމާން ބައިސްކަލު ދުއްވަމުން ދިޔަ ލޭނު، ބޭކާރު ގޮތެއްގައި، އަވަސް އަވަހަށް ބަދަލުކުރުމެވެ. މީގެ އިތުރުން ސަލްމާން ބައިސްކަލު ދުއްވަމުންދިޔައީ ހެލްމެޓެއްވެސް ނާޅާ ކަމުން، މިއީ ފުލުހުންވެސް އެކަމާ ދެކޮޅަށް ފިޔަވަޅު އަޅަންޖެހޭނެ ކަމެއްކަމަށް ބައެއް ފަރާތްތަކުން ދަނީ ވަކާލާތު ކުރަމުންނެވެ.
ކަންމިހެންއޮތްއިރު، ސަލްމާންހާންއާއި ދެކޮޅަށް ނޫސްވެރިއަކު ހުށަހެޅި މައްސަލައެއްގައިވެސް ފުލުހުންގެ ފަރާތުން އެދެވޭ އެއްބާރުލުމެއް ނުލިބުމުގެ ސަބަބުން އެ މައްސަލަ މިހާރު އޮތީ ކޯޓުގައެވެ.
