އަނެއްކާވެސް ޝަރުއީ މައްސަލައެއްގައި ބެދިފައިވާ ސަލްމާން ހާންގެ ކުރިއަށް އޮތް ފިލްމް "ދަބަންގް 3"ގައި އޭނާ ފެނިގެންދާނީ، ފުލުހުންނާއެކު ލަވައަކަށް ފައި ހަމަކުރަމުންދާތީ ކަމަށް ބޮލީވުޑްގެ ޚަބަރުތައް ބުނަން ފަށައިފިއެވެ.
އަލީ އައްބާސް ޒަފަރުގެ "ބަހާރަތު"ގެ ކާމިޔާބީގެ އުފަލުގައި ހުރި ސަލްމާން، މިހާރު ވަނީ "ދަބަންގް 3"ގެ މަސައްކަތްތައް ފަށާފައެވެ. އެގޮތުން މި ފިލްމުގައި ހިމެނޭ "ސީތީ" ނަމަކަށް ކިއާ ލަވައަކަށް، ސަލްމާން ނަށަމުންދާނީ އިންޑިއާގެ ފުލުހުންނާއެކުގައި ކަމަށް އިންޑިއާގެ ޚަބަރުތައް ބުނެއެވެ.
މީގެ އިތުރުން "މުންނާ ބަދުނާމް ހުއާ" ނަމަކަށް ކިއާ ލަވައަކަށްވެސް "ދަބަންގް 3" ގައި ސަލްމާން ފައިހަމަކުރާނެ ކަމަށް މީޑިއާ ރިޕޯޓްތައް ބުނެއެވެ.
ނޫސްވެރިއެއްގެ ފޯނު "ފޭރިގަނެ" އޭގައި ހުރި މައުލުމާތު ޑިލީޓުކޮށް، ނޫސްވެރިޔާއަށް ފުރައްސާރަކުރި މައްސަލާގައި ސަލްމާންއާއި ދެކޮޅަށް ކޯޓަށް މައްސަލައެއް ވައްދާފައިވަނީ، ފުލުހުންގެ ފަރާތުން އެދެވޭ ކުރިއެރުމެއް ނުލިބިގެން ކަމަށް މައުލޫމާތު ލިބެއެވެ.
