ހައްދުފަހަނައަޅާފައި ވާ ޓެރަރިސްޓް އައިސިސް ޖަމާއަތާ ގުޅުންހުރި 155 މީހަކު މިހާތަނަށް އިންޑިއާއިން ހައްޔަރު ކޮށްފައި ވާކަމަށް އިންޑިއާގެ ދާހިލީ ވުޒާރާއިން ބުނެފިއެވެ.
ހައްޔަރުކުރި މީހުންގެ ތެރޭގައި އައިސިސްގެ ހަނގުރާމަވެރިންނާ އެޖަމާއަތަށް އެއްބާރުލުންދޭ މީހުންވެސް ހިމެނޭކަމަށް މައުލޫމާތު ލިބެއެވެ.
އިންޑިއާގެ ދާހިލީ ވުޒާރާއިން ބުނީ، އިންޑިއާގެ އެކި ސްޓޭޓްތަކުން އައިސިސް ޖަމާއަތާ ގުޅެމުންދާ ވަކިވަކި ފަރުދުންނާ ބެހޭ މައުލުމާތުވެސް އެގައުމުގެ މަރުކަޒީ އަދި ދައުލަތުގެ ސަލާމަތާ ބެހޭ އިދާރާތަކުގެ ސަމާލުކަމަށް ގެނެސްފައިވާކަމަށެވެ.
އިންޑިއާގެ ގާނޫނު ހަދާ މަޖިލީހަށް ލިޔުމުން ޖަވާބުދާރީ ވެވަޑައިގެން ފޮނުއްވި ސިޓީފުޅުގައި އިންޑިއާގެ ދާހިލީ ވަޒީރު ޖީ ކިޝާން ރެޑީ ވިދާޅުވީ، އައިސިސްއިން ޕްރޮޕަގަންޑާ ފަތުރަމުންދަނީ އިންޓަނެޓް މެދުވެރިކޮށް، ސޯޝަލް މީޑިއާގެ ޒަރިއްޔާއިންކަމަށެވެ. އެހެންކަމުން ސައިބާސްޕޭސްގައި ހިނގާ ކަންކަން ވަރަށް ގާތުން ވިލަރެސް ކުރެވެމުން ދާކަމަށާ، ކަންބޮޑުވާ ކަމެއް ފާހަގަ ކުރެވިއްޖެނަމަ އެކަމަށް ފިޔަވަޅުތަކެއް އަޅަމުން ދާކަމަށެވެ.
އިންޑިއާ ކަނޑުގެ އައްސޭރި ފަށާ ގުޅިފައިވާ ސްޓޭޓްތަކާ ޔޫނިއަން ޓެރިޓަރީތަކުގެ ފާރަވެރިކަން އިތުރުކޮށް، ކަނޑުގެ ސަރަހައްދުގެ ސަލާމަތާ ގުޅުންހުރި ކަންކަން ހަރުދަނާކުރުމުގެ ގޮތުން ޕެޓްރޯލް ކުރުމުގެ މަސައްކަތް ކުރިއަށް ގެންދިއުމަށް އެސަރަހައްދުތަކަށް އިރުޝާދު ދެއްވާފައިވާނެ ކަމަށްވެސް ވަޒީރު ވަނީ ވިދާޅުވެފައެވެ.
ދާދިފަހުން ސްރީލަންކާއަށް ދިން ޓެރަރިސްޓް ހަމަލާއަކީވެސް އައިސިސްއާއި ގުޅުންހުރި ހަމަލަތާކަކަށްވާއިރު، އެ ހަމަލާތަކާ ގުޅުންހުރި ގިނަ ބަޔަކު އިންޑިއާގައި ހަރަކާތްތެރިވެ، އިންޑިއާގެ މަރުކަޒުތަކަކުން ތަމްރީނު ހޯދިކަމަށް ބުނާ އަޑުތަކެއްވެސް ވަނީ ފެތުރިފައެވެ.
