ކަންގަނާ ރެނޯޓްއާއި ރާޖުކުމާރު ރާއޯގެ އެންމެ ފަހުގެ ފިލްމް "މެންޓަލް ހޭ ކިޔާ"ގެ ޓްރޭލާ އާންމު ނުކުރާ ގޮތަށް ހަމަޖައްސައިފިއެވެ.
ބޮލީވުޑް ދުނިޔޭގެ އިތުރުން ސިއްހީ ދާއިރާއާއި ގުޅިފައިވާ ގިނަ ބައެއްގެ ފާޑުކިއުންތައް އެ ފިލްމުގެ ނަމަށް އެކަނިވެސް އަމާޒުވެފައިވާ ފިލްމް "މެންޓަލް ހޭ ކިޔާ"ގެ ޓްރޭލާ އާންމު ކުރުމަށް ކުރިން ހަމަޖެހިފައި އޮތީ މިއަދަށެވެ.
މި ފިލްމަކީ ނަފްސާނީ ބަލީގެ މީހުންނަށް ކުރާ ފުރާސައެއްކަމަށް ބުނެ، ގިނަ ބަޔަކު ފާޑުކިއަމުންދާއިރު، ޕްރޮޑިއުސާ އެކްތާ ކަޕޫރު ބުނީ ނަފްސާނީ ބަލީގެ މީހުންގެ އިހުސާސްތަކަށް މި ފިލްމުގައި ވަރަށް ބޮޑަށް ބަލާފައިވާނެކަމަށެވެ.
އަނެއް ބަޔަކު ބުނާ ގޮތުގައި ފިލްމްގެ ނަން ކަމުގައިވާ "މެންޓަލް ހޭ ކިޔާ" އަކީ، ނަފްސާނީ ބަލީގެ މީހުންގެ އަގުވައްޓާ، ދަށްކޮށްލާ ފަދަ ނަމެކެވެ.
ނުރަސްމީކޮށް އިންޓަނެޓް މެދުވެރިކޮށް ޓްރޭލާ ނެރުމަށް ސެންސަރު ބޯޑާ އެނޫންވެސް އިދާރާއަކުން ހުއްދަ ނަގަން ނުޖެހޭއިރު، ބޮލީވުޑްގެ ދުނިޔެ މިހާރު އިންތިޒާރުކޮށްގެން އޮތީ އިތުރު ޕްލެޓްފޯމެއް މެދުވެރިކޮށް "މެންޓަލް ހޭ ކިޔާ"ގެ ޓްރޭލާ އާންމުވެގެންދާނެ ވަގުތަކަށެވެ.
