ތަޖުރިބާކާރު އެކްޓަރު ރިޝީ ކަޕޫރާ ސުޕާސްޓާ ސަލްމާން ހާންގެ ކޯޅުންގަނޑުގެ ވާހަކައަކީ ބޮލީވުޑް ފޭނުންނަށް އާ ވާހަކައަކަށް ނުވާނެއެވެ. މި ކޯޅުންގަނޑެއް ފެށުނީ ސޯނަމް ކަޕޫރުގެ ކައިވެނި ހަފުލާގެ ތެރެއިންނެވެ. މައްސަލައަކަށްވީ، ހަފުލާގެ ތެރޭގައި ރިޝީ ކަޕޫރަށް ސަލްމާން ހާން މަރުހަބާ ނުކިއުމެވެ. ސަލްމާން ހާންގެ ފަހަރި ސީމާ ހާން ރިޝީ ކަޕޫރާ ދެމީހުންގެ މެދުގައި ހޫނުގަދަ "ކުރިމަތިލުންތަކެއް" ވެސް ހިނގިއިރު، މިކަންވެސް ވީ، އާއިލާގެ ދިފާއަށް އަބަދުވެސް އަރާ ސަލްމާންއަށް ހަޖަމު ކުރެވޭ ވަރުގެ ކަމަކަށް ނޫނެވެ.
މީޑިއާގައި ނަން ހާމަނުކޮށް، ސަލްމާން ވަނީ އެތައް ފަހަރެއްގެ މަތިން ރިޝީ ކަޕޫރަށް ބަހުގެ ހަމަލާތައް ދީފައެވެ. އެގޮތުން އެނާއާއި އޭނާގެ އާއިލާގެ އެއްވެސް މެމްބަރަކަށް ބޭ އިހުރިތާމް ކުރާ މީހަކަށް އޭނާގެ ފަރާތުން ހައްގުވާ އިހުތިރާމުގެ ކުޑަ މިންވަރެއްވެސް ނުއޮންނާނެ ކަމަށް ސަލްމާން ދިޔައީ ބުނަމުންނެވެ. އަދި ބޮލީވުޑްގެ ހާންދާނުގެ މެމްބަރުންނަށް ބަލާއިރު، ސަލްމާން ހާންގެ ގެއަށް މަރުހަބާ ނުކިޔާނެ ބަޔަކުވެސް އުޅޭނެކަން ސަލްމާން ވަނީ ފާހަގަކޮށްފައެވެ.
ނަމަވެސް މިހާރު ފެންނަނީ މަންޒަރު ބަދަލުވަމުންދާތަނެވެ. ސަލްމާން ހާން މިހާރު ފެންނަނީ، ރިޝީ ކަޕޫރުގެ ސިއްހަތާ ބެހޭ އެންމެ ފަހުގެ މައުލޫމާތުގެ ވާހަކަ ދައްކާތީއެވެ. ރިޝީ ކަޕޫރު މިހާރު ހުރީ ކެންސަރު ބައްޔަށް ފަރުވާ ކުރުމަށް އެމެރިކާގައެވެ. ފަރުވާއަށްފަހު ރިޝީ ކަޕޫރު އެނބުރި ގައުމަށް އައުމުން އޭނާގެ ގާތަށް ޒިޔާރަތް ކުރުމަށްވެސް ސަލްމާން ވިސްނަމުންދާކަމުގެ އަޑުތައް ވަނީ ފެތުރިފައެވެ.
ރިޝީ ކަޕުރާ އޭނާގެ އާއިލާއަކީ ސަލްމާންއާއި އެއްގަލަކަށް އަރާ ބަޔަކަށް ނުވި ކަމުގައި ވީ ނަމަވެސް ރިޝީ ކަޕޫރުގެ ސިއްހީ ހާލަތަކީ، ބޮލީވުޑް ސިނާއަތުގެ ކޮންމެ މީހަކަށްވެސް މުހިންމު ކަމެއްކަމަށް އޮތީ ވެފައެވެ.
