ފިތުރު އީދު ބަންދާ ދިމާކޮށް ރިލީޒުކުރި ބޮލީވުޑް ފިލްމް "ބާރަތު" އޮންލައިންކޮށް ލީކުކޮށްލައިފިއެވެ.
ސަލްމާން ހާންގެ ކުޅަދާނަ އެކްޓިންގް ފެނިގެންދާ ފިލްމް "ބާރަތު" ލީކުކޮށްލާފައިވަނީވެސް މިފަހަކަށް އައިސް ގިނަ ފިލްމުތަކަކާ ސީރީސްތަކެއް ލީކުކުރަމުންދާ "ޓެމިލްރޮކާޒް"އިންނެވެ.
އީދު ބަންދާ ދިމާކޮށް ރިލީޒްކުރި ނަމަވެސް މި ދުވަސްވަރަކީ އިންޑިއާގައި އެންމެ ވައިގައި ހިފާފައިވާ ކުރިކެޓްގެ ވާލްޑްކަޕް ކުޅެމުންދާ ދުވަސްވަރު ކަމުން ސިނަމާތަކަށް ގޮސް މި ފިލްމު ބެލުމަށް ހީކުރި ވަރުގެ ޑިމާންޑެއް ނެތް ކަމަށްވެސް މުނިފޫހިފިލުވުމުގެ ދާއިރާގެ ޚަބަރުތައް ބުނެއެވެ.
ޓެމިލްރޮކާޒް މިހާރު "މަޝްހޫރު" ވެފައިވަނީ އެ ފިލްމެއް ސިނަމާތަކުގައި އަޅުވާ ދުވަހު، އޮންލައިން ޕްލެޓްފޯމަށް ލީކުކޮށްލާ ހަބެއްގެ ގޮތުގައެވެ. ޕައިރަސީއާއި ދެކޮޅަށް އިންޑިއާގެ ސަރުކާރުން މަސައްކަތްތަކެއް ކުރި ކަމުގައި ވީ ނަމަވެސް، ޓެމިލްރޮކާޒްގެ މަސައްކަތް އަދި ހުއްޓުވާލެވިފައެއް ނުވެއެވެ.
