ސްރީލަންކާގެ އެކި ހިސާބުތަކަށް އަމާޒުކޮށް އޭޕްރިލް 21 ވަނަ ދުވަހުން ޓެރަރިސްޓް ހަމަލާގައި ބޭނުންކުރި ބޮންތައް އުފެއްދުމުގައި ބޭރުގެ ފަރާތްތަކެއްގެ އެހީތެރިކަން ހޯދާފައިވާކަމަށް ތަހުގީގު ޓީމުންބުނެފިއެވެ.
ބައިނަލްއަގުވާމީ މީޑިއާއާއި ވާހަކަ ދައްކަމުން ތަހުގީގު ޓީމުން ބުނީ، މި ބޮން ތަކަކީ ބާރުގަދަ މާއްދާއެއް ކަމަށްވާ ޓްރައިއެސެޓޯން ޓްރައިޕެރޮކްސައިޑް (މަދާ އޮފް ސޭޓަން) ބޭނުންކޮށްގެން އުފައްދާފައިވާ ބޮންތަކެއް ކަމަށާ، މި ޒާތުގެ ބޮމަކީ، ހައްދުފަހަނައަޅާފައިވާ ހަނގުރާމަވެރި އައިސިސް ޖަމާއަތުން ޝައުގުވެރިވާ ޒާތުގެ ބޮންތަކެއް ކަމަށެވެ.
އޭޕްރިލް 21ގެ ހަމަލާތަކުގައި އަމިއްލައަށް މަރުވެގެން ހަމަލާ ދިން މީހުން ބޭނުންކުރި ދަބަސްތަކަކީ ސްރީލަންކާގެ ހަނގުރާމަވެރިން ތައްޔާރުކުރި ދަބަސްތަކެއް ކަމަށާ، ނަމަވެސް މިކަންކޮށްފައިވަނީ އައިސިސް ޖަމާއަތުން ހިތްވަރު ހޯދައިގެން ކަމަށްވެސް ތަހުގީގު ޓމުން ވަނީ ބުނެފައެވެ.
މީޑިއާއާއި ވާހަކަދެއްކެވި ތަހުގީގު ޓީމުގެ އޮފިޝަލަކު ވިދާޅުވީ، ބޮން އުފައްދަން ބޭނުންކޮށްފައިވާ ތަކެއްޗަކީ، ފަސޭހަކަމާއެކު އައިސިސްއަށް ހޯދިދާނެ އެއްޗިހިތަކެއް ކަމަށެވެ.
ނަންނަން ހާމަނުކުރުމަށް އެދި އިތުރަށް ތަފްސީލު ކޮށްދެއްވަމުން އޮފިޝަލު ވިދާޅުވީ، މިދަރަޖައަށް ބޮން އުފެއްދޭނީ މޫނާ މޫނު ދިމާވާ ގޮތަށް ބަދަލުވެގެން ދެވޭ އިރުޝާދެއް ތެރެއިން ކަމަށާ، މިއީ ޔޫޓިއުބް ވީޑިއޯއެއް ބަލައިގެން ކުރެވޭނެ ކަމެއް ނޫންކަމަށެވެ.
ކަމާ ބެހޭ ފަރާތްތަކުން މިހާރު ދަނީ ސްރީލަންކާގައި ޓެރަރިސްޓް ހަމަލާ ދިން މީހުން، ބޮންތައް ތައްޔާރުކުރުމަށް މަސައްކަތް ކުރަމުންދިޔަ ގޮތް ބެލުމަށް ތަހުގީގުތަކެއް ފަށާފައެވެ.
އޭޕްރިލް 21 ވަނަ ދުވަހުގެ ހަމަލާތަކުގައި 250 އަށްވުރެ ގިނަ މީހުންގެ ފުރާނަ ގެއްލި 500 އަށްވުރެ ގިނަ މީހުން ޒަހަމްވެފައިވެއެވެ. މި ހަމަލާތައް ދިނުމުގައި އިސްކޮށް ހަރަކާތްތެރިވެފައިވަނީ ސްރީލަންކާގެ ރައްޔިތެއް ކަމަށްވާ ޒަހްރާން ހާޝިމްއެވެ. އޭނާވެސް މި ހަމަލާތަކުގައި އަމަލީ ގޮތުން ބައިވެރިވެ، އަމިއްއަލަ ހަށިގަނޑު ގޮއްވާލާފައިވާއިރު، އެއީ ހަމަ އޭނާކަން ޑީއެންއޭޣެ އެހީގައި މިހާރު ވަނީ ކަށަވަރުކޮށްފައެވެ.
