ދީނީ ހަރުކަށި ފިކުރުގައި ހައްދުފަހަނަ އަޅާފައިވާ ނޭޝަނަލް ތައުހީދު ޖަމާއަތު (އެންޓީޖޭ) އާއި ގުޅުން އޮންނަ ކަމުގެ ކުށުގެ ތުހުމަތުގައި ސްރީލަންކާއިން އެންމެ ފަހުން ހައްޔަރުކުރި 6 މީހުންގެ ތެރޭގައި އެގައުމުގެ ގާނުނު ހަދާ މަޖިލީހުގެ އިސް އޮފިޝަލަކު ވެސް ހިމެނޭކަމަށް ޚަބަރު ލިބިއްޖެއެވެ.
އެންޓީޖޭއަކީ އޭޕްރިލް 21 ވަނަ ދުވަހު ސްރީލަންކާގެ އެކި ހިސާބުތަކުގައި ޓެރަރިސްޓް ހަމަލާތައް ދިނުމުގައި އަމަލީ ގޮތުން ބައިވެރިވި ހަނގުރާމަވެރި ޖަމާއަތް ކަމަށް ސްރީލަންކާ ސަރުކާރުން ދަނީ ބުނަމުންނެވެ. ހައްދުފަހަނައަޅާފައިވާ އައިސިސް ޖަމާއަތުންވެސް ވަނީ މި ހަމަލާތަކުގެ ޒިންމާ އުފުއްލާފައެވެ.
ސްރީލަންކާ ފުލުހުންގެ ތަރުޖަމާނު ރުވާން ގުނަސޭކަރު ވިދާޅުވީ އެންޓީޖާއާއި ގުޅުން އޮތް 3 މީހަކު އެންމެ ފުރަތަމަ ހައްޔަރުކުރެވުނީ އެ ޖަމާއަތުގެ ތަމްރީނު ކޭމްޕުކަމަށް ބެލެވޭ ސަރަހައްދު ހޯދުނު ދުވަހުކަމަށާ، އިތުރު މީހުންގެ މައުލޫމާތު ލިބެމުންދަނީ އެ މީހުންނާ ކުރަމުންދާ ސުވާލުތަކުގެ ސަބަބުން ކަމަށެވެ.
މިމައްސަލާގައި ހޯދަމުންދާ ހޯދުންތަކުން ލިބިފައިވާ ކުރިއެރުންތަކަށް ބަލާއިރު، ހޮސްޕިޓަލެއްގައި މަސައްކަތްކުރާ މުވައްޒަފަކުވެސް މިހާރު ވަނީ ކަމާ ބެހޭ ފަރާތްތަކުގެ ބެލުމުގެ ދަށަށް ގެންދެވިފައެވެ. އެމީހާއާއި ގުޅުންހުރި ތަންތަން ބަލާ ފާސްކުރިއިރު، ގިނަ އަދަދަކަށް ފައިސާގެ ޗެކުތައްވެސް ފެނިފައިވާކަމަށް ގުނަސޭކަރު ވިދާޅުވިއެވެ.
ގާނޫނު ހަދާ މަޖިލީހުގެ އިސް އޮފިޝަލު ހައްޔަރުކުރެވުނީ ފަހުން ހައްޔަރުކުރެވުނު 2 މީހުންނާ ސުވާލުކުރުމަށް ފަހު ލިބުނު މައުލޫމާތުގެ އަލީގައިކަން ގުނަސޭކަރު ވަނީ ހާމަކުރައްވާފައެވެ. އެ އޮފިޝަލުގެ ބަންދުގެ މުއްދަތަށް 90 ދުވަސް ޖަހާފައިވާކަމަށް ޚަބަރު ލިބެއެވެ. އުމުރުން 42 އަހަރުގެ މިމީހާއަކީ ކެންޑީއަށް ނިސްބަތްވާ މީހެއް ކަމަށްވެސް ލަންކާ ފުލުހުންގެ ތަރުޖަމާނު ވަނީ ހާމަކުރައްވާފައެވެ.
އޭޕްރިލް 21 ވަނަ ދުވަހުގެ ޓެރަރިސްޓް ހަމަލާތަކުގައި ސްރީލަންކާގެ ރައްޔިތުންނާ ބޭރުގެ ފަތުރުވެރިންވެސް ހިމެނޭ ގޮތަށް 250 އަށްވުރެ ގިނަ މީހުންގެ ފުރާނަ ގެއްލި، އެތައް ސަތޭކަ ބަޔަކަށް ވަނީ އެކި ވަރުގެ ޒަހަމްތައް ލިބިފައެވެ. އެ ހަމަލާތަކަށްފަހު ސްރީލަންކާގައި ދިރިއުޅޭ މުސްލިމުންނަށް އަމާޒުކޮށް ވަރުގަދަ ހަމަލާތަކެއް ދީ، މުސްލިމަކު މަރާ، ގިނަ ބައެއްގެ މުދަލާ ތަކެއްޗާ ތަންތަނަށް ހަމަލާ ދީފައިވާއިރު، މި ހުރިހާ ކަމަކީވެސް ސްރީލަންކާ ސަރުކާރު ފެއިލްވުމުން މެދުވެރިވާ ކަންކަން ކަމަށް އެގައުމުގެ އިދިކޮޅު ފަރާތްތަކުން ދަނީ ބުނަމުންނެވެ.
ސްރީލަންކާގެ އިދިކޮޅު، ޕީޕަލްސް ލިބަރޭޝަން ފްރަންޓް (ޖޭވީޕީ)އިންވަނީ އޭޕްރިލް 21ގެ ހަމަލާތަކާ ގުޅިގެން ސަރުކާރުގެ މައްޗަށް އިތުބާރު ނެތްކަމުގެ މައްސަލައެއް މިއަދުގެ ވަގުތެއްގައި ގާނޫނު ހަދާ މަޖިލީހަށް ވައްދާނެ ކަމަށް ބުނެފައެވެ.
އޭޕްރިލް 21 ވަނަ ދުވަހުގެ ހަމަލާތަކާ ގުޅޭ ޖާސޫސީ މައުލޫމާތު، އެ ހަމަލާތަކުގެ ކުރިން ސްރީލަންކާގެ ސަރުކާރާ ކަމާ ބެހޭ ފަރާތްތަކަށް ލިބިފައި އޮތް ނަމަވެސް، އެކަމަށް ފިޔަވަޅެއް ނޭޅި އޮތީ ސަރުކާރު ތެރޭގައި އުފެދިފައިވާ ދެބަސްވުންތަކާ ބައިބައިވުންތަކުގެ ސަބަބުން މުއާމަލާތު ކުރުމަށް އެރި ބުރުލެއްގެ ސަބަބުން ކަމަށް ޚުދު ލަންކާ ސަރުކާރުގެ އިސް އޮފިޝަލުންވެސް ވަނީ އިއުތިރާފުވެވަޑައިގެންފައެވެ.
