މާޗް މަހުގެ 15 ވަނަ ދުވަހު ނިއުޒީލަންޑްގެ ކްރިސްޓްޗާޗުގެ 2 މިސްކިތަކަށް ދިން ބަޑީގެ ހަމަލާތަކުގައި ޒަހަމްވި ތުރުކީވިލާތުގެ މީހާ މަރުވިކަން ތުރުކީ ހާރިޖިއްޔާއިން ކަށަވަރުކޮށްދީފިއެވެ.
ތުރުކިވިލާތުގެ ހާރިޖީވަޒީރު މެވްލޫތު ކާވުސޮގްލޫ ވަނީ، ކްރިސްޓްޗާޗް ހަމަލާގައި ސީރިއަސް ޒަހަމްތަކެއް ލިބުނު ތުރުކިވިލާތުގެ ރައްޔިތު މީހާ މަރުވިކަން ބަޔާންކުރައްވާ، ޓުވީޓެއް ކުރައްވާފައެވެ.
މަރުވި މީހާގެ އާއިލާގެ ފަރާތުން މީޑިއާއާއި ވާހަކަ ދެއްކި މީހަކު ބުނީ ސާޖަރީއެއް ހެދުމަށް ބުރާސްފަތި ދުވަހު އޭނާ ހޮސްޕިޓަލަށް ގެންދެވުނު ކަމަށާ، ނަމަވެސް އޭނާގެ ފުރާނަ ސަލާމަތް ނުކުރެވުނީ ކަމަށެވެ. އޭނާ މަރުވީ ލޭ މަނާ ނުކުރެވިގެން ކަމަށްވެސް އާއިލާއިން ވަނީ ބުނެފައެވެ. ފާއިތުވީ 50 އަކަށް ދުވަހު އެއާއިލާއިން ތިބީ އޭނާ ރަނގަޅުވަމުން އަންނަ ކަމަށް ހީކޮށް ވަރަށް އުފަލުން ކަމަށްވެސް އާއިލާގެ ފަރާތުން ވާހަކަ ދެއްކި މީހާ ވަނީ ބުނެފައެވެ.
އިސްލާމުންނާ ދެކޮޅަށް ހައްދުފަހަނައަޅާފައިވާ ފިކުރެއް ގެންގުޅެމުންދިޔަ އުމުރުން 28 އަހަރުގެ ބްރެންޓަން ޓެރަންޓް ބަޑި ހިފައިގެން ވަދެ މިސްކިތްތަކުގައި ތިބި މީހުންނަށް އަމާޒުކޮށް ދިން ލާއިންސާނީ ހަމަލާތަކުގައި މަރުވި މީހުންގެ އަދަދު މިހާރު މިވަނީ 51 އަށް އަރާފައެވެ. އޮސްޓްރޭލިއާގެ ރައްޔިތެއް ކަމަށްވާ ޓެރަންޓް މިވަގުތު ހުރީ ނިއުޒީލަންޑްގެ ކަމާ ބެހޭ ފަރާތްތަކުގެ ބެލުމުގެ ދަށުގައެވެ. ނިއުޒީލަންޑްއިން އޭނާއާއި ދެކޮޅަށް ދައުވާ ކުރަމުންދަނީ ގަސްތުގައި މީހުން މެރިކަމުގެ ކުށުގައެވެ.
