މި އަހަރުގެ މަޖިލިސް އިންތިހާބުގައި އަމިއްލަ ގޮތުން ކެލާ ދާއިރާއަށް ވާދަ ކުރާ ކެންޑިޑޭޓު މުހައްމަދު ނާޒިމް، އެމްޑީޕީގެ ފަރާތުން އެ ދާއިރާއަށް ވާދަކުރާ އިބްރާހިމް ޝަރީފަށް ތާއީދު ކުރަން ނިންމައިފިއެވެ.
އިބްރާހިމް ޝަރީފަށް ތާއީދު ކުރުމަށް އެ ދާއިރާ އަށް ވާދަ ކުރާ އަދާލާތު ޕާޓީގެ ކެންޑިޑޭޓް ތޫބާ ރަޝީދު ވެސް މީގެ ދެދުވަސް ކުރިން ވަނީ ނިންމާފައެވެ.
ނާޒިމް އެމްޑީޕީގެ ކެންޑިޑޭޓަށް ތާއީދު ކުރުމަށް ނިންމާފައި ވަނީ، އޭނާ ކުރިމަތިލާނަމަ ސަރުކާރަށް ގޮނޑި ކާމިޔާބު ކުރުމުގެ ފުރުސަތު އެ ކަމުގެ ސަބަބުން ހަނިވެދާނެތީ ކަމަށް އޭނާ ޓްވީޓް ކޮށްފައި ވެއެވެ.
ނާޒިމް ގެ މި ނިންމުމާ ގުޅިގެން، ވަރަށް ހޫނު މަރުހަބާ އެއް ދަންނަވާކަމަށް ކުރީގެ ރައީސް މުހައްމަދު ނަޝިދު ވިދާޅުވެއެވެ.
މި އަހަރުގެ މަޖިލިސް އިންތިހާބުގައި ކެލާ ދާއިރާއަށް ޖުމްލަ 6 ކެންޑިޑޭޓުން ވާދަ ކުރުމަށް އިލެކްޝަނަށް ނަން ހުށައަޅާފައި ވެއެވެ. އެއީ އަމިއްލަ ގޮތުން ވާދަ ކުރާ މުހައްމަދު ނާޒިމާއި، އާދަމް ފަޒީލް އާއި، މުހައްމަދު އަހްލާމް އާއި، އަދާލަތު ޕާޓީގެ ފަރާތުން ވާދަ ކުރާ ތޫބާ ރަޝީދާއި، އެމްޑީޕީގެ އިބްރާހިމް ޝަރީފާއި، ޕީޕީއެމްގެ ކެންޑިޑޭޓް އަލީ އާރިފެވެ.
