ރަސްފަންނު މޫދަށް އެރޭ ސަރަހައްދުގައި ނަޖިސް ފެތުރޭތީ އެެތަން ބަންދުކޮށްފިއެވެ.
ފުލުހުން ބުނީ ސިޓީ ކައުންސިލްގެ އެދުމުގެ މަތިން، ރަސްފަންނު މޫދަށް އެރޭ ސަރަހައްދަށް ނަޖިސް ފެތުރިފައިވާތީ ސިޓީ ކައުންސިލްގެ އެދުމުގެ މަތިން އެތަން ހުސްކޮށް ބަންދުކޮށްފިއެވެ.
މީގެ ކުރިން ވެސް ރަސްފަނު މޫދަށް އެރޭ ސަރަހައްދަށް ނަޖިސް ބޭރުވުމުގެ ސަބަބުން ސިޓީ ކައުންސިލުން އެތަން ހުސްކޮށް ސާފުކޮށްފައި ވެއެވެ. އަދި އެތަން އާންމުންނަށް ހުޅުވައިލީ އެތަނުގެ ޓެސްޓްތަކެއް ހެދުމަށްފަހު އެތަނަކީ މޫދަށް އެރެން ރައްކާތެރި ތަނެއްކަން ކަށަވަރު ކުރުމަށް ފަހުގައެވެ.
"ދަޕްރެސް" އާ ވާހަކަ ދައްކަވަމުން މާލެ ސިޓީ ކައުންސިލްގެ ޑެޕިއުޓީ މޭޔާ ޝަމާއު ޝަރީފް ވިދާޅުވީ، އާންމުންގެ ފަރާތުން ލިބުނު ޝަކުވާތަކާއި ގުޅިގެން އެތަން ބެލިބެލުމުން ނަޖިސްގެ އަސަރު ކޮށްފައިވާ ކަން ފާހަގަ ކުރެވިގެން ރަސްފަންނު މޫދަށް އެރޭ ސަރަހައްދު އާންމުންނަށް ބަންދުކޮށްފައިވާ ކަމަށެވެ. އަދި އެ މައްސަލަ ހައްލު ކުުރުމުގެ މަސައްކަތް ކަމާ ބެހޭ ފަރާތްތަކާއެކު ކުރަމުން ދާކަމަށާއި، އާންމުންނަށް އެތަން އަލުން ހުޅުވައިލާނީ އެތަނުގެ ރައްކާތެރިކަން ކަށަވަރު ކުުރުމަށްފަހުގައި ކަމަށެވެ.
"އާންމުންގެ ފަރާތުން ލިބުނު ޝަކުވާއާއި ގުޅިގެން އެތަން ބެލި ބެލުމުން އެކަން ފާހަގަވެގެން ބަންދުކޮށްފައިވާނީ މިހާރު. އެޗްޕީއޭއާއި އަދި ކަމާގުޅުންހުރި ފަރާތްތަކާއެކު އެތަނުގެ ލޮނުގަނޑުގެ ޓެސްޓްތައް ހަދަން ފަަށައިފިން. އަދި ނޭނގޭ ނަޖިސް ލީކުވެގެން އުޅެނީ ކީއްވެގެން ކަމެއް. ހުޅުވާނެ ދުވަހެއްވެސް ބުނަން އަދި ނޭނގޭ. ޓެސްޓްތައް ނިމުމުން ރައްކާތެރިކަން ކަށަވަރުކޮށްފައި ހުޅުވާނީ" ޝަމާއު ވިދާޅުވިއެވެ.
އޭނާ ވިދާޅުވީ މީގެ ކުރިން ވެސް އެތަނަށް ނަޖިސް ލީކުވެފައިވާ ކަމަށާއި، ނަޖިސް އެއިރު ލީކުވީ އެތަން ހެދިއިރު އެ ހިސާބުގައި ހުރި ނަޖިސް ހޮޅިތަކުން ކަމަށެވެ. އަދި އައިޖީއެމްއެޗާއި ދިމާލުން ނަޖިސް ހޮޅިތަކެއް ބޭރުކޮށްފައި ހުރި ކަމަށާއި، ކުރިން ރަސްފަންނަށް ނަޖިސް ލީކުވެފައިވަނީ އޭގެ ސަބަބުން ކަމަށެވެ.
ރަސްފަންނަކީ މާލޭގައި ދިރިއުޅެމުން އަންނަ ގިނަ އަދަދެއްގެ ބަޔަކު މޫދަށް އެރި އުޅޭ ސަރަހައްދެކެވެ. އަދި މިތަނަށް ގިނަ އަދަދެއްގެ ބަޔަކު ކަސްރަތު ކުރުމަށާއި، އާއިލާއެކު ޕިކްނިކް ދިއުމަށް ބޭނުންކުރަމުން ދެއެވެ.
