ޓޫރިޒަމް މިނިސްޓަރު އަލީ ވަހީދު، ކުރީގެ ރައީސް މައުމޫން އަބްދުލްގައްޔޫމަށް ކުރިން ކިޔުއްވި އެއްޗެއްސަށް، މާފު ކުރައްވައިފި ކަމަށް މައުމޫން ވިދާޅުވެއްޖެއެވެ.
މައުމޫން މިހެން ވިދާޅުވީ، ޒުވާން ދުވަސްވަރު މައުމޫނާ ދިމާލަށް ކިޔުއްވުނު އެއްޗެއްސާ މެދު ހިތާމަ ކުރައްވާ ކަމަށް އަލީ ވަހީދު ވިދާޅު ވެފައި ވާތީ އެވެ. އެކަމާ ގުޅިގެން ރައީސް މައުމޫން ކުރެއްވި ޓްވީޓުގައި އަލީވަހީދަށް ޝުކުރު އަދާ ކުރައްވާފައި ވެއެވެ.
"ޝުކުރިއްޔާ އަލީ ވަހީދު. މާފު ކޮށްފިން އިނގޭތޯ" މައުމޫން ވިދާޅުވެފައި ވެއެވެ.
އަލީ ވަހީދު ވިދާޅުވީ ޒުވާން އިރު އެހާވަރަށް ނުވިސްނޭ ކަމަށާއި، ޕޯޑިއަމް ތަކުގައި އެގޮތަށް ވާހަކަ ދެއްކެވިފައި ވާތީ އެކަމާ ދެރަވެލައްވާ ކަމަށެވެ. އަދި މިނިސްޓަރަކަށް ވެވަޑައިގަތުމަށް ފަހު މައުމޫން އަރިހުން މާފަށް އެދިވަޑައިގެންފައި ވާނެ ކަމަށް ވެސް އަލީ ވަހީދު ވިދާޅުވިއެވެ. ސިޔާސީ ހިޔާލު ތަފާތު ވުމަކީ ޒާތީ ވާން ޖެހޭ ކަމެއް ކަމަށް ދެކެވަޑައި ނުގަންނަވާ ކަމަށް ވެސް އޭނާ ވިދާޅުވިއެވެ.
އަލީ ވަހީދަކީ މައުމޫން އިސްވެ ހުންނަވައިގެން އުފެއްދެވި ދިވެހި ރައްޔިތުންގެ ޕާޓީގެ (ޑީއާރްޕީ) ގެ، 'ސްޕޯކްސް ޕާސަން' އެއްގެ ގޮތުގައި ސިޔާސީ ދާއިރާއަށް ނިކުންނެވި ބޭފުޅެކެވެ. އޭނާ ޑީއާރްޕީ ދޫކުރައްވާ އެމްޑީޕީއާ ގުޅި ވަޑައިގެންފަހު، މައުމޫނަށް ބަހުގެ ހޫނު ހަމަލާ ތަކެއް ރައްދުކުރައްވާފައި ވެއެވެ.
