ދައުލަތުގެ ބަޖެޓުން މަދުވެގެން ފަސް އިންސައްތަ ކަނޑައަޅާނީ ކައުންސިލްތަކަށް ކަމަށާއި، ކައުންސިލްތަކުގެ ދަށުގައި ހިމެނޭ ބިމާއި، ރަށްރަށާއި، ފަޅާއި ފަރުތަކުން ނެގޭ، ކުލީގެ ގޮތުގައި ލިބޭ އާމްދަނީގެ ސާޅީސް އިންސައްތަ، ސީދާ އެ ކައުންސިލަކަށް ލިބޭ ގޮތަށް ހަމަޖެހިގެން ދާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ފުރިހަމަ ލާމަރުކަޒީ ނިޒާމެއް ގެނައުމަކީ، އެމަނިކުފާނުގެ އެންމެ މުހިންމު އެއް ވައުދުފުޅު ކަމަށާއި، ކުރީ ސަރުކާރުން މިނިސްޓްރީތަކަށް ނަގާފައި ހުރި، ލޯކަލް ކައުންސިލްތަކުގެ ބާރުތައް އެ ކައުންސިލްތަކަށް އަނބުރާ ދެއްވަން ފަށްޓަވައިފި ކަމަށެވެ. ރައީސް ވިދާޅުވީ ލާމަރުކަޒީ ގާނޫނަށް ގެންނަންޖެހޭ އިސްލާހުތައް ރައްޔިތުންގެ މަޖިލިހަށް ހުށަހަޅުއްވައިފައިވާ ކަމަށެވެ.
"މި އިސްލާހުުތަކާއެކު ރާއްޖޭގެ ހިންގުމަށް އިންގިލާބީ ބަދަލުތަކެއް އަންނާނެ. ލާމަރުކަޒީ ގާނޫނަށް އަޅުގަނޑުމެން މި ހުށަހެޅި އިސްލާހުތަކުގެ ތެރެއިން، އެންމެ މުހިންމު އެއްކަމަކީ، މާލީ ބާރުވެރިކަން ކައުންސިލްތަކަށް ދިނުން. ދައުލަތުގެ ބަޖެޓްގެ މަދުވެގެން ފަސް އިންސައްތަ ކަނޑައަޅާނީ ކައުންސިލްތަކަށް ކަމަށް، މި ބިލުގައި ވާނީ ހިމަނާފައި" ރައީސް ވިދާޅުވިއެވެ.
ރައީސް ވިދާޅުވީ ކައުންސިލްތަކުގެ ބެލުމުގެ ދަށުގައި ހިމެނޭ ބިމާއި، ރަށްރަށާއި، ފަޅާއި ފަރުތަކުން ނެގޭ، ކުލީގެ ގޮތުގައި ލިބޭ އާމްދަނީގެ 40 އިންސައްތަ، ސީދާ އެ ކައުންސިލަކަށް ލިބޭގޮތަށް ހަމަޖެހިގެން ދާނެ ކަމަށެވެ. ރައީސް ވިދާޅުވީ ކައުންސިލްތަކަށް އިންތިހާބު ކުރާ މެންބަރުންގެ ތެރެއިން އަންހެނުންގެ އިންސައްތަ 33 އަށް ހައްދަވާނެ ކަމަށެވެ. އަދި މީގެ އިތުރުން ވެސް މުހިންމު އިސްލާހުތަކެއް، މި ބިލުގައި ހިމެނޭނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ދަނޑުވެރިކަމާއި، މަސްވެރިކަމުގައި އުޅޭ އަމިއްލަ މީހުންނަށް، މާލީ އިދާރާތަކުންނާއި، ބޭންކުތަކުން ލޯނު އަދި ކްރެޑިޓް ސްކީމުތަކުގައި ބައިވެރިވެވޭނެ އިންތިޒާމް ހަމަޖެހި، މި ސްކީމްގެ ދަށުން މިހާތަނަށް 201 މަސްވެރިން ވަނީ ބޭންކް އޮފް މޯލްޑިވްސްގެ [މަސްވެރިޔާ އެކައުންޓް] ހުޅުވާފައި ކަމަށެވެ.
ރައީސް ވިދާޅުވީ މަސްވެރީން ގަންނަ ޑީސަލުން ނަގަމުން އައި ޑިއުޓީއާއި، ދަނޑުވެރިކަމަށް އިމްޕޯޓްކުރާ ތަކެތިން ނަގަމުން އައި ޑިއުޓީ ކަނޑާލުމުން، މީގެ ފައިދާ މަސްވެރީންނަށާއި ދަނޑުވެރީންނަށް ލިބޭނެ އިންތިޒާމު ވަރަށް އަވަހަށް ހަމަޖެހިގެންދާނެ ކަމަށެވެ. މީގެ އިތުރުން ކުދި އަދި މެދު ފަންތީގެ ވިޔަފާރިތަކަށް، މާލީ އެހީތެރިކަން ފޯރުކޮށްދިނުމަށް އުފެއްދި، އެސްއެމްއީ ބޭންކުގެ ހިދުމަތް ފެށި އެކަމުގެ ސަބަބުން ރައްޔިތު މީހާގެ މާލީ ހާލަތު ރަނގަޅުވެގެން ދާނެ ކަމަށްވެސް ވިދާޅުވިއެވެ.
