ރާއްޖޭގެ ސިޔާސީ، އިގްތިސާދީ އަދި ޝަރުއީ ދާއިރާ އެންމެ ބޮޑަށް ކިލަނބު ވެފައިވަނީ، ކޮރަޕްޝަނާއި ނާޖާއިޒް ފައިދާގެ ސަބަބުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހުގެ ސަރުކާރުގެ 90 ދުވަހުގެ ވައުދުތައް ފާހަގަ ކުރުމަށް ބޭއްވި ހަފްލާގައި ވާހަކަ ދައްކަވަމުން ރައީސް ވިދާޅުވީ ރާއްޖޭގެ ތަރައްގީއަށްޓަކައި، ކޮރަޕްޝަނާއި ނާޖާއިޒް ފައިދާ ނެގުން ހުއްޓުވަން ޖެހޭ ކަމަށެވެ. އެމަނިކުފާނު ވިދާޅުވީ ކޮރަޕްޝަނާ ގުޅޭ ގޮތުން މި ސަރުކާރުގެ ސިޔާސަތަކީ ޒީރޯ ޓޮލަރެންސް ކަމަށެވެ. ރައީސް ވިދާޅުވީ ކޮރަޕްޝަނަށް މަގުފަހިވާ ކަންކަން ހުއްޓުވައި، އެފަދަ އަމަލުތައް ރިޕޯޓް ކުރުމަށް، ޒީރޯ ޓޮލެރެންސް ޓް ކޮރަޕްޝަން ޕޯޓަލް މިހާރު އާންމުންނަށް ހުޅުވާލާފައިވާ ކަމަށެވެ.
އެމަނިކުފާނު ވިދާޅުވީ ދައުލަތުގެ މާލީ ހަލަތަކީ ރައްޔިތުންނަށް އެނގެންޖެހޭ ކަމެއް ކަމަށެވެ. އަދި ރައްޔިތުންގެ ފައިސާ ހަރަދު ކުރެވޭ ގޮތް ރައްޔިތުންނަސް އެނގެންޖެހޭ ކަމަށާއި، މިއީ ދެފުށް ފެންނަ އުސޫލުން ދައުލަތް ހިންގުމާއި ޖަވާބުދާރީ ވާނެ ސަރުކާރެއް އުފެއްދުމަށް ވަރަށް މުހިންމު ކަމެއް ކަމަށް ރައީސް ވިދާޅުވިއެވެ.
"ދައުލަތުގެ މާލީ ތަފްސީލްތައް، ފިނޭންސް މިނިސްޓްރީން އެ ދަނީ ކޮންމެ ހަފުތާއަކު އެއްފަހަރު ޝާއިއު ކުރަމުން. އަޅުގަނޑުމެން ރައްޔިތުންނަށް އަންގައިދޭން ބޭނުންވަނީ، އަޅުގަނޑުމެން ރައްޔިތުންގެ މުދަލާއި ފައިސާއަށް ހިޔާނާތްތެރި ނުވާނެކަން" ރައީސް ވިދާޅުވިއެވެ.
ކޮރަޕްޝަން ހުއްޓުވުމާއި، ވަކި މީހަކަށް ނާޖާއިޒް ފައިދާ ލިބޭނެގޮތަށް ހުރި ގާނޫނުތަކަށް ބަދަލުގެނެސް އެޓާނީ ޖެނެރަލްގެ އޮފީހުން މިހާރު ވަނީ މަޖިލީހަށް ފޮނުވާފައެވެ. އޭޖީ އޮފީހުން ބުނެފައި ވަނީ ވަކި މީހަކަށް ނުވަތަ ވަކި ބަޔަކަށް ގެއްލުމެއް ދިނުމަށް ނުވަތަ ވަކި މީހަކަށް މަންފާއެއް ހޯދުމަށް، ބަދަލުކޮށް ފާސްކޮށްފައިވާ ގާނޫނުތައް ބަލައި މުރާޖާ ކުރަން ފަށާފައިވާ އިރު، ވިސްލްބްލޯ ކުރާ ފަރާތްތައް ރައްކާތެރި ކުރުމުގެ ބިލާއި، ނުހައްގު މުއްސަނދިވުން ހުއްޓުވުމަށް ބިލެއް މަޖިލީހަށް ހުށަހެޅިފައިވާ ކަމަށެވެ.
