އެމެރިކާގެ ރައީސް ޑޮނާލްޑް ޓްރަމްޕްއާއި ބެހޭ ގޮތުން ސްޕެޝަލް ކައުންސެލް ރޮބާޓް މުލާ ތައްޔާރުކުރައްވާފައިވާ ތަހުގީގީ ރިޕޯޓްގައި، އެމެރިކާގެ ތަހުގީގީ އިދާރާ (އެފް.ބީ.އައި) އާއި ބެހޭ ގޮތުން ޓްރަމްޕް ހައްދަވާފައިވަނީ އިތުރުފުޅެއް ކަމަށް، އެފް.ބީ.އައިގެ ކުރީގެ ޑައިރެކްޓާ ޖޭމްސް ކޯމީ ވިދާޅުވެއްޖެއެވެ.
2016 ވަނަ އަހަރުގެ ރިޔާސީ ރޭސް ކާމިޔާބު ކުރުމަށްޓަކައި ޓްރަމްޕް ކެމްޕޭނުން ރަޝިޔާގެ ނުފޫޒުގެ ބޭނުންކޮށްފައިވާ ކަމަށް ބުނާ މައްސަލައާ ގުޅިގެން މުލާ ހިންގެވި ތަހުގީގުގެ ރިޕޯޓްގެ ހުލާސާ ކޮންގްރެސްއިން އާންމުކުރި ފަހުން ފުރަތަމަ ފަހަރަށް މީޑިއާއަކަށް ދެއްވި ބަސްދީގަތުމުގައި ކޯމީ ވިދާޅުވީ، އެފް.ބީ.އައި 'ނެތިކޮށްލުމަށް' ޓްރަމްޕް ކުރައްވާ މަސައްކަތްޕުޅުތައް ފެއިލްވެފައިވާކަމަށެވެ.
އެން.ބީ.ސީ ނިއުސްއަށް ދެއްވި ބަސްދީގަތުމެއްގައި ކޯމީ ވިދާޅުވީ، އެފް.ބީ.އައިއަކީ ކޮރަޕްޓްވެފައިވާ މުއައްސަސާއެއް ނޫންކަމާ، އެފް.ބީ.އައިގައި މަސައްކަތްކުރައްވަމުން ދަނީ ހަގީގީ ހޯއްދެވުމަށް މަސައްކަތްކުރައްވާ، ތެދުވެރި ގުރޫޕެއްކަން ކޮންގްރެސްގައި އިއްވިދިޔަ ޚުލާސާ ބަޔާން އަޑުއެއްސެވި ކޮންމެ ފަރާތަކަށްވެސް ކަށަވަރުކުރެއްވޭނެ ކަމަށެވެ.
މިމޭރުމުން ވާހަކަފުޅު ދައްކަވަމުން ކޯމީ ވިދާޅުވީ، ގައުމުގެ އަދުލު އިންސާފުގެ ނިޒާމަކީ ނުރައްކަލެއް ކަމުގައި ދެކެވަޑައިގެން އަދުލު އިންސާފުގެ ނިޒާމު ނިކަމެތިކޮށްލެއްވުމަށް، އެމެރިކާގެ ތާރީހަށް ބެލިކަމުގައި ވީ ނަމަވެސް އެއްވެސް ރައީސަކު މަސައްކަތްޕުޅުކުރައްވާފައިވާތީ މީގެ ކުރިން ފެނިފައި ނުވާކަމަށެވެ.
ކޮންމެ ފަދަ މޭރުމަކުން ޓްރަމްޕްގެ ވާހަކަފުޅު ހުރި ކަމުގައި ވީ ނަމަވެސް، އެފް.ބީ.އައިގެ ހަގީގަތާ، ރައީސްކަމުގައި ހުންނެވި ބޭފުޅާގެ ހަގީގަތަކީ އެމެރިކާގެ ރައްޔިތުން ދަންނަ ހަގީގަތްތަކެއް ކަމަށާ، ދިގުމުއްދަތަކަށް ބަލާއިރު މިފަދަ މުއައްސަސާތަކަށް ސަލާމަތްތެރިކަން އެބައޮތް ކަމަށްވެސް ކޯމީ ވަނީ ފާހަގަކުރައްވާފައެވެ.
ރިޔާސީ އިންތިހާބަށް ރަޝީޔާގެ ނުފޫޒު ހޯއްދެވި މައްސަލައާއި ގުޅިގެން މުލާ ތައްޔާރުކުރެއްވި ރިޕޯޓްގެ ހުލާސާ ބުނާ ގޮތުގައި، މިފަދަ ކަމެއް ހިނގާފައެއް ނުވެއެވެ. ނަމަވެސް އެމެރިކާގެ އަދުލު އިންސާފުގެ ނިޒާމަށް ނުފޫޒު ފޯރުވުމަށް ޓްރަމްޕް މަސައްކަތްކުރެއްވި ކަމަށް ކުރެވޭ ތުހުމަތުތަކާ ގުޅިގެން އެކަށީގެންވާ ހެކި ހޯދިފައި ނުވާތީ، އެމައްސަލާގައި ވަކި ގޮތެއް ނިންމެން ނެތް ކަމަށްވެސް މި ރިޕޯޓްގައި ބަޔާންކޮށްފައިވާކަމަށް ހުލާސާގައި ވަނީ ބުނެފައެވެ.
މި ތަހުގީގު ފުރިހަމަ ރިޕޯޓް އަދި އާންމުންނާ ހިސާބަށް ތިލަވެފައެއްނުވެއެވެ.
