މުހައްމަދު ނަޝީދުގެ ސަރުކާރުގެ ރައީސް އޮފީހުގެ އަންޑަ ސެކްރެޓަރީ، އިބްރާހިމް ރަޝީދު (ހޯރަ އިއްބެ) މިނިވަން ކުރެއްވިގެން ރައީސް އިބްރާހިމް މުހައްމަދު ސޯލިހު ހިތާމަ ކުރައްވަން ޖެހިވަޑައި ނުގަންނަވާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅު ވެއްޖެއެވެ.

'ދަޕްރެސް' އަށް މިރޭ ދެއްވި އިންޓަވިއު އެއްގައި އަދުރޭ ވިދާޅުވީ، ހޯރަ އިއްބެ މިނިވަން ކުރެއްވުނީތީ އެކަމާ ހިތާމަ ކުރައްވާކަމަށް ރައީސް މިއަދު ވިދާޅުވީ، މީހުންނަށް ދެއްކުމަށް ނުވަތަ ސިމްޕަތީ ހޯއްދެވުމަށް ކަމަށް ގަބޫލު ކުރެއްވޭ ކަމަށެވެ. އަދި އޭނާ މިނިވަން ކުރެއްވި އިރުވެސް އެއީ ކުޑަ ކުއްޖަކާ އެއްކޮށް ބަދު އަހުލާގީ އަމަލު ހިންގައިގެން ހައްޔަރު ކޮށްފައި ހުރި މީހެއް ކަމާއި އެއީ ކިހާވަރެއްގެ ކުށެއް ކަމާއި އަދި އެކުށަށް މާފު ދިނުމާ ނުދިނުން އޮންނަނީ ކިހިނެތް ކަން ރައީސް އަށް އެނގިވަޑައި ގަންނަވާނެ ކަމަށް އަދުރޭ ވިދާޅުވިއެވެ.

"އޭރުގަ ދޫކުރެއްވި އިރުވެސް ރައީސް އަށް އެނގިވަޑައި ގަންނަވާނެ ހޯރަ އިއްބެ އަކީ ކުޑަ ކުއްޖަކާ އެއްކޮށް ބަދު އަހުލާގީ އަމަލު ހިންގައިގެން ހައްޔަރު ކޮށްފަ ހުރި މީހެއް ކަން. އަދި އެއީ ކިހާވަރެއްގެ ކުށެއް ކަން .އެކުށަށް މާފު ދިނުމާ ނުދިނުމާ މިކަންކަން އޮންނަނީ ކޮން ގޮތަކަށް ކަން" އަދުރޭ ވިދާޅުވިއެވެ.

އަދުރޭ ވިދާޅުވީ ހޯރަ އިއްބެ ރައީސް ސޯލިހު މިނިވަން ކުރެއްވީ އެ ހުރިހާ ކަމެއް އެނގިވަޑައިގެން ހުންނަވާ ކަމަށާއި، އޭނާ މިނިވަން ކުރެއްވި ކުރެއްވުމަކީ އަވަސް އަރުވާލައިގެން، ރޭވިގެން ކުރެއްވި ކަމެއް ކަމަށް ގަބޫލު ކުރައްވާ ކަމަށެވެ.

މީގެ އިތުރުން، ރައީސް އެހެން އެ ވިދާޅުވަނީ މަޖިލިސް އިންތިހާބާ ދިމާކޮށް ބަޔަކު އެވާހަކަ ދައްކަން ފެށީމާ، މީހުންގެ 'ސިމްޕަތީ' ހޯއްދަވަން ނުވަތަ، އެކަމާ ކަންބޮޑުވާކަން އެހެން މީހުންގެ ކުރިމަތީގައި ދެއްކެވުމަށް ކަމަށް އަދުރޭ ދެކިލައްވާ ކަމަށް އޭނާ ވިދާޅުވިއެވެ.

ރައީސް ސޯލިހު މިއަދު ވިދާޅުވީ ކޯލިޝަނުން ގެނައި ސަރުކާރުގެ ކުރީ ކޮޅުގައި ޖަލުގައި ހުރި މީހަކު މިނިވަން ކުރެއްވުނީތީ އެކަމާ ހިތާމަ ކުރައްވާ ކަމަށެވެ. އެކަމަކު އެއީ ކާކުކަމެއް ރައީސް ސޯލިހު ހާމަ ކުރައްވާފައެއް ނުވެއެވެ.

ސަރުކާރުގެ ކުރީކޮޅު ޖަލުން މިނިވަން ކޮށްފައިވަނީ ކުޑަކުއްޖަކާ އެކު ބަދުއަހުލާގީ އަމަލެއް ހިންގައިގެން، އޭރު ޖަލުގައި 10 އަހަރުގެ ޖަލު ހުކުމެއް ތަންފީޒު ކުރަމުން ދިޔަ ހޯރަ އިއްބެއެވެ.

ސިޔާސީ