ސަރުކާރު ކޯލިޝަންގައި ހިމެނޭ ޕާޓީތަކުން، ބައެއް ފަރާތްތައް ވަޒީފާއިން ވަކިކުރުމަށް އެދި ހުށަހަޅުއްވާ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް ވިދާޅުވީ ސަރުކާރު އޮތީ ކޯލިޝަނެއްގައި ކަމަށާއި، އެކި ޕާޓީތަކުން އެކި ކަންކަމުގައި އެދިވަޑައިގަންނަވާ ކަމަށެވެ. އަދި ސަރުކާރު ފޯމްކޮށްގެން ކުރިއަށްދާން ދަތިވި އެންމެ ބޮޑު ސަބަބަކީ، އަދި މިހާރު ވެސް ހުރި އެއް ދައްޗަކީ ވަޒީފާ ދިނުމާއި، ވަޒީފާއިން މީހުން ވަކި ކުރުމުގެ މަސައްކަތް ކަމަށް ރައީސް ވިދާޅުވިއެވެ.
"ޕާޓީތަކުން ފޮނުވާ ނަންތައް ނުވަތަ މީހުންނަށް ވަޒީފާ ދިނުން އެ ޕާޓީއަކުން ބާރުއަޅާ ކަމެއް. އަދި ބައެއް ފަރާތްތައް ވަޒީފާއިން ވަކިކުރަން ވެސް އެބަ އާދޭ. އެހެންވެ ވަޒީފާއެއް ނުދެވޭ ކޮންމެ ފަހަރަކީ ބޮޑު މައްސަލައަކަށް ވެގެން އެބަދޭ. އަދި ވަޒީފާ ދޭއިރަށް އެއަށް ޕަބްލިކްގައި ފާޑުކިޔާ. މިއީ މިހާތަނަށް ހައްލުކުރަން އެންމެ އުނދަގޫވި ކަމަކީ" ރައީސް ވިދާޅުވިއެވެ.
ރައީސް ވިދާޅުވީ ވަޒީފާ ދިނުމާއި ވަޒީފާ ނުދިނުމާއި އެ ދެކަންތަކުގައި އުނދަގޫވެލައްވާ ކަމަށެވެ. އަދި ބައެއްފަހަރު ވަޒީފާގެ ލިސްޓް ހިފަހައްޓައިފި ނަމަ ބައެއް ލީޑަރުން ތިމަންނަ މެންނަށް ލިބެންޖެހޭ ބައި ނުލިބޭނެ ކަމަށް ބުނެ ވާހަކަ ދައްކަވަމުން ދާ ކަމަށެވެ. ނަމަވެސް ދައުލަތުގެ މަގާމަކަށް އައްޔަން ކުރަންވާނީ އެކަމަކަށް އެކަށީގެންވާ ބޭފުޅުން ކަމަށް ރައީސް ވިދާޅުވިއެވެ.
މިހާރު ވައްބަހުން މަށާބެހެން ފެށީދޯ؟ ވަޒީފާގެ ވާހަކަ ދެއްކީ މަވިއްޔާ؟