ދިވެހިރާއްޖޭގައި އޮންނާނެ ވެރިކަމުގެ ނިޒާމު ކަނޑަ އެޅުމަށް ރައްޔިތުންގެ ވޯޓަކަށް ދާން ޖެހޭނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މައްޗަންގޮޅި މެދު ދާއިރާގެ މަޖިލިސް ބަހުސްގައި ވާހަކަ ދައްކަވަމުން ނަޝީދު ވިދާޅުވީ ވެރިކަމުގެ ނިޒާމާ ބެހޭ ގޮތުން ފެންނަ ނުފެންނަ ވޯޓެއް ނެގުނު އިރު، އެ ވޯޓުގައި ރާއްޖޭގައި ވޯޓު ލުމުގެ ހައްގު ލިބިފައިވާ މީހުންނަށް ވުރެ ގިނަ މީހުން ވޯޓު ލީކަމަށް އިއުލާނު ކުރި ކަމަށެވެ. ރާއްޖޭގައި އޮންނާނީ ރިޔާސީ ނިޒާމެއް ކަމަށް އިއުލާނު ކުރީ އެ ވޯޓަށް ފަހުގައި ކަމަށް ވެސް ނަޝީދު ވިދާޅުވިއެވެ.
"ގާނޫނު އަސާސީ ވަކީ ހިސާބަކށް އިސްލާހު ކުރުމަށް ފަހުގައި ފެންނަ ނުފެންނަ ވޯޓެއް ނެގުނީ ވެރިކަމުގެ ނިޒާމާ ބެހޭ ގޮތުން. އެ ވޯޓުގައި ރާއްޖޭގައި ވޯޓު ލާން ހައްގު ލިބިފައިވާ މީހުންނަށް ވުރެ ގިނައިން ވޯޓު ލީކަމަށް އިއުލާނު ވެސް ކުރި. އެ ވޯޓަށް ފަހު ރިޔާސީ ނިޒާމެއް ކަމުގައި ވެރިކަމުގެ ނިޒާމު ކަނޑައެޅިގެން ދިޔައީ. އަޅުގަނޑުމެން ދެކޭ ގޮތުގައި، އަޅުގަނޑުމެން މިއަދު ވެސް އަމަލު ކުރަން ޖެހޭ ގޮތް އަލުން އަނބުރާ ދެނެގަތުމަށް ޓަކާ ޖެހޭނީ ރައްޔިތުންގެ ވޯޓަކަށް ދާން" ނަޝީދު ވިދާޅު ވިއެވެ.
ނަޝީދު މިރޭ ވިދާޅުވީ ދިވެހިރާއްޖޭގެ ރައްޔިތުން ރާއްޖޭގައި އޮންނަން ފެންނަނީ ރިޔާސީ ނިޒާމެއް ކަމަށް ކަނޑަ އަޅައިފިނަމަ އެގޮތަށް އަމަލު ކުރެއްވުމަށް ތައްޔާރަށް ހުންނެވި ކަމަށާ، ރައްޔިތުން އެހެން ގޮތަކަށް ނިންމި ނަމަވެސް އެގޮތަކަށް އަމަލު ކުރެވުމަށް ތައްޔާރަށް ހުންނެވި ކަމުގައެވެ.
މީގެ އިތުރުން ނަޝީދު ވިދާޅުވީ މިއަދު ބަލައިގެންފައިވާ ގާނޫނު އަސާސީ އަކީ ވަރަށް ޒާމާންވީ ހުދު މުހުތާރު ރިޔާސީ ނިޒާމަކާ ދެކޮޅަށް ހިންގި ހަރަކާތަކުން ލިބިފައިވާ ގާނޫނު އަސާސީ އެއް ކަމަށާއި، އެ ގާނޫނު އަސާސީން ރައްޔިތުންގެ މަޖިލީހަށް ދީފައިވާ ބާރުވެރިކަން ވަރަށް ބޮޑު ކަމަށެވެ.
