ކަނޑުދަތުރު ކުރާ އުޅަނދުފަހަރުގައި މަސައްކަތްކުރާ ފަޅުވެރީންގެ ހައްގުތައް ހޯދައި ދިނުމަށް ސަރުކާރުގެ ކަމާ ބެހޭ ފަރާތްތަކަށް މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ (ލޭބާ ޕާޓީ)ން ގޮވާލައިފިއެވެ.
ފަޅުވެރީންގެ ވަޒީފާގެ ހައްގުތަކާ، މަސައްކަތުގެ މާހައުލާ، ސިއްހަތާ މެދު ކަންބޮޑުވުން ފާޅުކޮށް ލޭބާ ޕާޓީން ނެރުނު ނޫސްބަޔާނުގައި ބުނެފައިވަނީ، ސަރުކާރުގެ ކަމާ ބެހޭ އިދާރާތަކުން ވަނީ އެކަންކަމާ މެދު އިހުމާލުވެފައި ކަމަށެވެ.
ލޭބާ ޕާޓީން ބުނީ، ގިނަ ދޯނިފަހަރާ ލޯންޗުފަހަރުގެ ކައްޕިންނާއި، ފަޅުވެރީންނަށް ވަޒީފާދޭ ފަރާތްތަކުން އެމީހުން ގެންގުޅެނީ ވަޒީފާގެ އެއްބަސް ވުމެއް ނެތިކަމަށެވެ. އަދި ހުކުރެއް ބަންދެން ނެތި، 24 ގަޑިއިރު ޑިއުޓީގައި ފަޅުވެރީން ގެންގުޅެމުން ދާއިރު، ބައެއް ފަރާތްތަކުން އެމީހުންނަށް މަހުން މަހަށް މުސާރަ ވެސް ނުދޭކަމަށް އެ ޕާޓީން ބުނެއެވެ. އަދި އެމީހުންނަށް، ކިތަންމެ ބޮޑު ކަމެއް ދިމާ ވެގެން ވެސް ޗުއްޓީ ލިބޭނެ އުސޫލެއް ކަނޑައެޅިފައި ނޯންނަ ކަމަށާ، ޗުއްޓީއަށް ދާން ބޭނުން ވެއްޖެ ނަމަ އެމީހުން ޗުއްޓީއަށް ދަނީ ވަޒީފާއިން ކެނޑިގެން ކަމަށް ވެސް ލޭބާ ޕާޓީގެ ނޫސް ބަޔާނުގައި ފާހަގަ ކޮށްފައި ވެއެވެ.
ފަޅުވެރީންގެ މަސައްކަތު މާހައުލުގެ ރައްކާތެރިކަމާ ސިއްހަތާ ބެހޭ ގޮތުން ހުރި މައްސަލަތައް ފާހަގަކޮށް، ލޭބާ ޕާޓީން ބުނީ، މަދު ދޯންޏެއްގައި ނޫނީ ސާފު ބޯފެންފޮދެއް ލިބޭނެ އިންތިޒާމު ހަމަޖެހިފައި ނުހުންނަ ކަމަށާ، އެމީހުން ތިބެނީ ކައިގެންތޯ ނުވަތަ ނިދައިގެންތޯ ބަލާނެ ފަރާތްތަކެއް ނުހުންނަ ކަމަށެވެ. އަދި ގިނަ އުޅަނދު ފަހަރުގައި ކާނާ ރައްކާތެރި ކުރެވޭނެ އިންތިޒާމެއް ހަމަޖެހިފާ ނުވާ ތާނގައި، ބައެއް އުޅަނދު ފަހަރުގައި ކައްކާއެއް ނުހުންނަ ކަމަށާ ފެންވަރާ ފާހާނާ ކުރެވެން ވެސް ނުހުންނަ ކަމަށް އެ ޕާޓީން ބުނެއެވެ.
ބައެއް އުޅަނދު ފަހަރުގެ ފަޅުވެރީން ނިދަން ޖެހެނީ، ދޭހާ އަތްވެއްގައާއި ވެހޭހާ ވާރޭއެއްގައި ކަމަށާއި، ހޫނުގަދަވެގެން ފަންކާއެއް ޖަހާލެވެން ނުވަތަ ފޯނު ޗާޖު ހުސްވުމުން ޗާޖަށް ޖެހޭނެ ފަދަ ވެސް އޭގައި ނުހުންނަ ކަމަށް ލޭބާޕާޓީގެ ނޫސް ބަޔާނުގައި ބުނެފައި ވެއެވެ.
ބައެއް އޮޑިވެރީން ހަރަދު ކުޑަ ކުރުމަށް، އެއްވެސް ފާހެއް ނެތް ބިދޭސީން ކައްޕިންނަށް ގެންގުޅޭ ކަމަށާއި، އެއީ ކަނޑުދަތުރު ކުރާ ފަރާތްތަކުގެ ސަލާމަތަށް ނުރައްކާ ހުރި ކަމެއްގެ ގޮތުގައި ލޭބާ ޕާޓީގެ ނޫސް ބަޔާނުގައި ފާހަގަ ކޮށްފައިވެއެވެ.
މިކަމާ ގުޅުން ހުރި ގާނޫނު ތަކާއި ގަވާއިދުތަކާއި އުސޫލުތައް ހަރުދަނާ ކޮށް، މި މައްސަލަ އަށް އަވަސް ހައްލެއް ގެނެސްދިނުމަށް ލޭބާ ޕާޓީގެ ނޫސް ބަޔާނުގައި، ސަރުކާރުގެ ކަމާ ބެހޭ ފަރާތްތަކަށް އިލްތިމާސް ކޮށްފައި ވެއެވެ.
