އާ ސިޔާސީ މަގާމެއް އުފައްދާ، 31 މީހުންނަށް އެ މަގާމު ދިނުމަށް ސަރުކާރުން ނިންމާފައި ވާހަކަމަށް ރައީސް އޮފީހުން މިއަދު ބުނެފިއެވެ.
ރައީސް އޮފީހުން ބުނީ، ސިޔާސީ އެންމެ ދަށް މަގާމެއްގެ ގޮތުގައި 'ޕޮލިސީ ޑިރެކްޓަރު' ގެ މަގާމު ހަމަޖައްސާ، އެ މަގާމަށް 31 މީހުންނަށް ވުރެ ގިނަ ނުވާ އަދަދަކަށް މީހުން އައްޔަނު ކުރަން ނިންމާފައި ވާކަމަށެވެ.
އެ މަގާމުގެ މުސާރަ އާއި އެލަވަންސްގެ ގޮތުގައި ކަނޑައަޅާފައި ވަނީ ޖުމުލަ 18،000 ރުފިޔާ އެވެ. އެއީ މުސާރައިގެ ގޮތުގައި ދޭ 11،000 ރުފިޔާ އާއި އެލަވަންސް ގެ ގޮތުގައި ދޭން ކަނޑައަޅާފައިވާ 7000 ރުފިޔާއެވެ.
މި މަގާމަށް އައްޔަނު ކުރަން ނިންމާފައިވާ މީހުންގެ ތެރެއިން ބައެއް މީހުނަށް މިހާރު މަގާމު ދީފައި ވާކަމަށް ރައީސް އޮފީހުން މައުލޫމާތު ދެއެވެ. އެގޮތުން، މިނިސްޓްރީ އޮފް ޔޫތު އެންޑް ސްޕޯޓްސް ގެ ޕޮލިސީ ޑިރެކްޓަރުގެ މަގާމަށް އަހުމަދު އިރާޝް ދާދި ފަހުން ވަނީ ހަމަޖައްސާފައެވެ.
މީގެ އިތުރުން ނެޝަނަލް ސެންޓާ ފޯ ދި އާޓްސްގެ އެގްޒެކެޓިވް ޑިރެކްޓަރަކަށް ފިލްމީ ތަރި އަހުމަދު އަޒްމީލް އައްޔަނު ކޮށްފައިވާއިރު، ހައުސިން މިނިސްޓްރީގެ އެގްޒެކެޓިވް ޑިރެކްޓަރުކަން ދީފައި ވަނީ، އެމްޑީޕީގެ އެކްޓްވިސްޓު މުހައްމަދު މައިމޫނަށެވެ.
ކުރީ ސަރުކާރުގައި ސިޔާސީ އެންމެ ދަށް މަގާމުގެ ގޮތުގައި ހަމަޖައްސާފައި ވަނީ، އެގްޒެކެޓިވް ކޯޑިނޭޓަރުންނާއި ކޯޑިނޭޓަރުންގެ މަގާމެވެ.
